Наўседа выказаўся наконт ідэі Ціханоўскага пра аўтаномныя «астравы» беларусаў у розных краінах
Прэзідэнт Літвы Гітанас Наўседа заявіў, што ніколі не згадзіцца на стварэнне аўтаномій на тэрыторыі Літвы. Аднак ён адзначае, што словы Сяргея Ціханоўскага, які выказаў такую ідэю, не варта ўспрымаць усур’ёз, піша Delfi.lt.
У інтэрв'ю праекту «Жыццё-маліна» ў пачатку ліпеня Сяргей Ціханоўскі сказаў, што ў выпадку няўдачы звяржэння рэжыму Аляксандра Лукашэнкі, беларусы, якія пакінулі радзіму, маглі б ствараць «астравы» з аўтаноміяй.
«Я хачу жыць у Беларусі, у турме шмат пра гэта думаў. Калі беларусы не захочуць змагацца, не будуць верыць мне — няхай вераць камусьці іншаму, галоўнае, каб яны змагаліся, каб гэта дало вынік. Калі гэта не дае выніку… Я пачну ствараць такія астравы. У Расіі была такая нямецкая аўтаномная вобласць, нешта падобнае, была і яўрэйская. Мы можам развівацца і так. Краіна — гэта ж людзі», — гаварыў былы палітвязень.
У Літве, дзе цяпер жывуць Ціханоўскія, гэты словы выклікалі дыскусію. Прэзідэнт Літвы Гітанас Наўседа выказаўся з гэтай нагоды.
«Заўсёды ёсць розныя людзі, розныя меркаванні. Нарэшце, давайце ўлічваць той факт, што чалавек у жудасных умовах апошнія некалькі гадоў знаходзіўся ў турме. Магчыма, у яго крыху іншае ўяўленне пра працэсы, якія насамрэч адбываюцца, калі ён шмат гадоў правёў у цёмнай турме», — заявіў прэзідэнт Літвы журналістам у аўторак.
«Давайце зразумеем яго сітуацыю, пастараемся ацаніць цвяроза», — дадаў Наўседа.
Па словах кіраўніка літоўскай дзяржавы, няма сэнсу нават гаварыць пра аўтаномныя рэгіёны ў Літве. «Я ніколі не згаджуся на стварэнне якіх-небудзь астравоў у Літве. У нас былі спробы стварыць аўтаноміі ў перыяды незалежнасці — яны скончыліся нічым», — сказаў ён.
«Мы заўсёды гатовыя прыняць іншыя народы, што ратуюцца ад палітычных пераследаў, але перш за ўсё мы ўлічваем інтарэсы ўласнай нацыянальнай бяспекі. Гэта, на маю думку, сфера нацыянальнай бяспекі, і мы не дапусцім тут імправізацый», — заключыў Наўседа.
Кіраўнік аддзела міжнародных сувязяў Офіса Святланы Ціханоўскай Дзяніс Кучынскі заявіў, што беларусы не ўяўляюць пагрозы ні суверэнітэту Літвы, якая іх прытуліла, ні яе тэрытарыяльнай цэласнасці.
«Ніхто і ніколі не будзе ствараць ніякіх архіпелагаў у Літве. Гэта проста абсурд. Літвінізм — гэта дзецішча Мінска і крамлёўскіх спецслужбаў», — заявіў дыпламатычны дарадца Ціханоўскай.
-
Святлана Ціханоўская паведаміла літоўскім парламентарыям пра рашэнне пераехаць у Польшчу
-
«Пайшлі нах*й вы і ваш «Бацька», пі***асы!» П'яныя прыгоды зрабілі армяніна Ярванда палітвязнем. Цяпер ён змагаецца з праблемамі ў Польшчы
-
«Я — як супервумен». Як былая бібліятэкарка працуе прыбіральшчыцай у Беластоку — як спраўляецца і колькі зарабляе
Цяпер чытаюць
«Пайшлі нах*й вы і ваш «Бацька», пі***асы!» П'яныя прыгоды зрабілі армяніна Ярванда палітвязнем. Цяпер ён змагаецца з праблемамі ў Польшчы1
Каментары
Ціханоўскі гэтую кашу заварыў - яму і адказваць. Ці ён ляпнуў языком - і ў кусты?