У Беларусі захворванне на вострыя рэспіраторныя інфекцыі (ВРІ) знаходзіцца на нізкім узроўні, паведамілі ў Міністэрстве аховы здароўя.
У структуры ВРІ выяўляюцца негрыпозныя рэспіраторныя вірусы: парагрып, адэнавірусы, рынаовірусы, РС-вірусы, сезонныя каранавірусы, метапнеўмавірусы і г.д.
У той жа час спецыялісты папярэджваюць, што з надыходам восені чакаецца заканамерны рост захворванняў
Ён будзе звязаны з зменай умоў надвор’я і з пачаткам навучальнага працэсу ва ўстановах адукацыі.
У Мінздароўі прагназуюць: сезон захворвальнасці на ВРІ, грып і COVID-19 пачнецца ў кастрычніку. А пік росту можна чакаць у канцы студзеня — лютым 2026 года.
Адзначым, што статыстыка па кавідзе не агучваецца ўжо з лета 2022 года.
Кішэчныя інфекцыі
Традыцыйна ў канцы лета і пачатку восені адбываецца рост захворвальнасці на вострыя кішэчныя інфекцыі.
У Мінздароўі адзначылі, што пакуль назіраецца нязначны (на 22%) прырост інфекцый, выкліканых вірусамі (наравірусы, ротавірусы, энтэравірусы і г.д.).
У асноўным гэта звязана з вяртаннем дзяцей з адпачынку з такіх краін, як Турцыя, Егіпет.
Медыкі нагадваюць пра тое, што неабходна старанна мыць гародніну і садавіну, а таксама выконваць правілы асабістай гігіены.
А што ж COVID-19?
У гэтым сезоне рэгіструецца нізкі ўзровень захворвальнасці на каранавірус, распавялі ў Мінздароўі.
Там таксама адзначылі, што гэты вірус, як і любы іншы, працягвае эвалюцыянаваць, набывае свае асаблівыя ўласцівасці.
Не так даўно быў выяўлены новы варыянт каранавіруса «Стратус» — нашчадак варыянта «Амікрон».
Ён адрозніваецца высокай заразнасцю, але не выклікае цяжэйшага цячэння хваробы ў параўнанні з папярэднімі варыянтамі.
Характэрная прыкмета захворвання — змяненне голасу, хрыпласць або асіпласць.
У нашай краіне новы штам віруса XFG Stratus не выяўлены.
Каментары
А фактычна ў лякарнях летам палаты і калідоры поўныя хворых пнеўманіяй. Сімптомы і наступствы блізкія да COVID-19, але тэсты на яго даўно не робяць.
Людзі ж з-за мяжы ездзяць.