Кіраўнік Белаазёрска расказаў пра падрыхтоўку да «Дажынак», а людзі захэйцілі ў каментарах
У Белаазёрску пройдуць брэсцкія абласныя «Дажынкі» 2025 года. Горад рыхтуюць да правядзення свята і прыёму начальства, ідзе рамонт. Пра ход упарадкавання расказаў дзяржаўнай прэсе старшыня Белаазёрскага гарвыканкама Уладзімір Піліпец. А людзі накідалі меркаванняў у каментарах, піша выданне «Першы».
«На сённяшні дзень асноўныя аб'екты прыведзены ўсе ў належны стан. Гэта дваровыя тэрыторыі, гэта ўпарадкаванне жылых дамоў, упарадкаванне плошчаў, спартзала. Басейн уведзены ў эксплуатацыю. Адкрыты парк, у якім будзе ўсталяваны помнік Герою Савецкага Саюза Свідзінскаму», — расказваў 21 жніўня ў тыктоку газеты «Заря» Уладзімір Піліпец.
Кіраўнік выканаўчай улады горада зрабіў выснову, што «Дажынкі» дазволілі правесці ўпарадкаванне Белаазёрска, «горад набыў цалкам новы знешні выгляд, новую інфраструктуру».
Пад ролікам у тыктоку пакінулі каля 50 каментароў, з іх відаць, што гэта мясцовыя жыхары. І далёка не ўсе ўхвалілі выступленне старшыні Белаазёрскага гарвыканкама.
Вось некаторыя з меркаванняў, што яшчэ ў горадзе не зрабілі ці зрабілі не так:
- «Мне вельмі шкада плошчы. Мне так яна падабалася, а цяпер — верталётная пляцоўка!»
- «На жаль, нас ніхто не пытаецца. Знішчылі такую прыгажосць».
- «Ды не паспееце вы гэта ўсё даляпіць! Пасля зімы ўсё паабсыпаецца, якасць работ на нулі! Хацелася б, каб нехта з адказных асоб панёс за гэта пакаранне».
- «На вуліцы Будаўнікоў, 23, 23а, 23б асфальт пакладзіце, калі вы заняліся ўпарадкаваннем».
- «Ад плошчы ўздоўж газетнага кіёска, 16, 18 дамоў па Энергетыкаў на пешаходнай сцежцы можна ногі скруціць. Людзі звярнуліся, сказалі — няма грошай».
- «Міру 12, з праспекта не відаць, нічога не робяць. Хочам упарадкаваць наш дом!»
- «На Міру 10 у двары «мрак».
- «Для дзяцей што-небудзь адкрыйце, дзяцей няма куды завесці пагуляць!»
- «62/1 — у двары асфальт пакладзіце, ямы па калена. А то закаталі ўвесь горад у плітку, каб не касіць».
- «Дарогі Міру 5А і 3 — гэта ж жах! І ніхто не збіраецца рабіць! Яма на яме!»
- «Паглядзім, што будзе з рамонтам фасада дома 62/1 вышэй за 5 паверх. Некалькі гадоў таму затынкавалі чырвоную цэглу, так і пакінулі шэрыя плямы. Непрыгожа глядзіцца з боку вуліцы Леніна».
- «Як паглядзіш на балконы шэра-чорныя, то… Няўжо нельга было прыгожыя колеры зрабіць?»
- «Звярніце ўвагу на дом Энергетыкаў, 7. Адзін дом не зроблены з усіх астатніх, яго атачаюць. Шэры, убогі. А асфальт па абодва бакі дома — гэта проста без слоў. Пліткі хапіла толькі да ББ, далей да канца вуліцы пліткі няма».
- «Міру 22-24, першыя дамы на ўездзе, першы двор. Нічога не робяць, а навошта — яго не відаць за дрэвамі! Ва ўсім горадзе пілавалі дрэвы, а ў нас не. Дарожкі перакапалі, іх і так там не было, а цяпер наогул не прайсці! Дарожка за каледжам у жахлівым стане і без асвятлення, горад энергетыкаў! А па ёй дзеці ў школу і сады ходзяць!»
Абласныя «Дажынкі» ў Белаазёрску пройдуць 4 кастрычніка, расказаў прэсе першы намеснік старшыні аблвыканкама Дзмітрый Гарадзецкі. Раней паведамлялася, што абласное свята працаўнікоў вёскі пераносіцца з раней запланаванай даты 27 верасня. Дарэчы, абласныя «Дажынкі» ў Брэсцкай вобласці пераносяцца другі год запар.
У пераддажыначным Заслаўі загаварыў па-расейску Сымон Будны ФОТАФАКТ
У вёсцы пад Оршай пры падрыхтоўцы да Дажынак знішчылі гістарычныя будынкі
Відэа, у якім кіраўнік Крычава прасіў жыхароў ахвяраваць на прыпынкі, выдалілі пасля рэзанансу
Праўладныя арганізацыі прапанавалі беларусам ананімна выказацца па «кірунках развіцця на пяцігодку». А людзі выклалі свой боль
Каментары