Каго больш цэняць жанчыны — тых, хто кажа «Я цябе кахаю», або тых, хто мые посуд?
Новае даследаванне паказала, што жанчыны больш цэняць у рамантычных адносінах — прызнанні ў каханні ці канкрэтныя праявы пачуццяў.
Новае даследаванне, апублікаванае ў часопісе Evolutionary Psychological Science, пралівае святло на тое, як невялікія штодзённыя паводзіны ўплываюць на выбар партнёра. У той час як і мужчыны, і жанчыны цэняць у партнёрах цеплыню і надзейнасць, яны па-рознаму ацэньваюць сігналы, якія пра гэта сведчаць, асабліва на ранніх этапах адносін. На публікацыю звярнула ўвагу выданне PsyPost.
У адрозненне ад ранейшых даследаванняў, што канцэнтраваліся на глабальных рысах накшталт прывабнасці, інтэлекту ці статусу, гэта праца засяродзілася на дробных штодзённых праявах увагі, якія лёгка змяніць і якія могуць мець вялікае значэнне на пачатковых этапах знаёмства.
Даследчыкі засяродзіліся на дзвюх катэгорыях дробных праяў увагі — «прыемныя словы» (словы падтрымкі і прызнання кшталту «Я сумую па табе», «Я цябе разумею») і «прыемныя ўчынкі» (прыгатаванне ежы, дапамога з паўсядзённымі справамі).
Абапіраючыся на эвалюцыйную тэорыю, навукоўцы выказалі здагадку, што жанчыны будуць аддаваць перавагу ўчынкам. Гэта звязана з тым, што жанчыны гістарычна шукаюць у партнёры надзейнасць і гатоўнасць укладвацца ў адносіны і сям'ю. Учынкі служаць лепшым доказам такой гатоўнасці.
Мужчыны ж, згодна з гэтай тэорыяй, больш адчувальныя да сігналаў непасрэднай эмацыйнай ці сэксуальнай зацікаўленасці, якую прасцей выказаць словамі.
Сутнасць эксперыменту
Каб праверыць гэтую гіпотэзу, было праведзена тры эксперыменты з удзелам 513 гетэрасексуальных дарослых кітайцаў.
У першым эксперыменце ўдзельнікам прапаноўвалі ўявіць сцэнары, дзе партнёр праяўляў любоў словамі (напрыклад, суцяшаў пасля цяжкага дня) або ўчынкамі (напрыклад, мыў посуд). Жанчыны палічылі ўчынкі больш пажаданымі, у той час як мужчыны прадэманстравалі адваротную тэндэнцыю, хоць і не такую выразную.
У другім эксперыменце ўдзельнікам прадставілі два гіпатэтычныя профілі партнёраў: адзін быў майстрам «прыемных слоў», другі — «прыемных учынкаў». Жанчыны зноў аддалі перавагу партнёру, які дзейнічаў, і ацанілі яго як больш цёплага і надзейнага. Мужчыны не паказалі відавочнай перавагі. Менавіта ўспрыманне цеплыні і надзейнасці стала ключавым фактарам выбару для жанчын.
У трэцім эксперыменце вынікі папярэдніх даследаванняў былі пацверджаны з новымі профілямі і больш дэталёвымі вымярэннямі цеплыні і надзейнасці. Жанчыны зноў выбралі ўчынкі, а мужчыны не паказалі значных пераваг.
Як расказваюць аўтары, ва ўсіх трох эксперыментах яны таксама праверылі, ці могуць звычкі саміх людзей у праяўленні клопату — праз словы ці праз учынкі — тлумачыць іх перавагі. Вынік паказаў, што паміж мужчынамі і жанчынамі няма розніцы ў тым, як яны звычайна праяўляюць свае пачуцці. Гэта значыць, што іх выбар не залежыць ад асабістых звычак ці стылю зносін.
Чаму ўчынкі такія важныя?
Па словах аўтараў, яны невыпадкова засяродзіліся на цеплыні і надзейнасці: менавіта гэтыя якасці людзі часцей за ўсё называюць галоўнымі ў ідэальным партнёры. Ранейшыя працы вызначылі тры асноўныя вымярэнні прывабнасці — цеплыня, знешнасць і статус, — але менавіта цеплыня і надзейнасць з'яўляюцца найважнейшымі для задаволенасці ў доўгатэрміновых адносінах.
«Прыемныя ўчынкі» лічацца больш надзейным сігналам цеплыні і надзейнасці, таму што яны патрабуюць намаганняў і іх цяжэй падрабіць. Словы, хоць і эмацыйна моцныя, могуць заставацца проста словамі без рэальнага падмацавання.
З эвалюцыйнага пункту гледжання жанчыны асабліва адчувальныя да паводзін, якія сігналізуюць пра гатоўнасць партнёра ўкладваць час і рэсурсы — ключавыя фактары для паспяховага выхавання дзяцей і доўгатэрміновай стабільнасці.
Абмежаванні даследавання
Варта адзначыць, што даследаванне мае некалькі абмежаванняў. Яно грунтавалася на гіпатэтычных сцэнарыях, а не на рэальных паводзінах. Пры гэтым усе ўдзельнікі былі з Кітая, таму вынікі могуць не распаўсюджвацца на іншыя культуры з іншымі гендарнымі нормамі.
У даследаванні не ўлічваліся індывідуальныя фактары — стыль прывязанасці, мінулы досвед адносін, адкрытасць да выпадковых сувязяў. Усё гэта можа ўплываць на тое, што людзі лічаць больш значным.
Цапкала і Балкунец атакавалі літоўскага палітыка, які дапамагаў беларусам пасля 2020‑га і спрычыніўся да справы, якую завёў пракурор у Гаазе28
Каментары