«Праверылі пашпарты і не пусцілі». Што расказалі пасажыры аўтобуса, які не паспеў заехаць у Польшчу
Польскі бок перастаў прымаць транспарт з пункта пропуску «Брэст» 12 верасня а 1.00 па мінскім часе. Затым польскія сілавікі расцягнулі калючы дрот і паставілі металічны плот. Заехаць у пункт пропуску «Тарэспаль» не паспелі некалькі аўтобусаў і легкавы аўтамабіль. Яны былі вымушаныя вярнуцца ў пункт пропуску «Брэст» для афармлення на ўезд у Беларусь, піша БелТА.
«Перад самым шлагбаумам нас не пусцілі палякі. Здалі назад — і заднім ходам сюды (у пункт пропуску «Брэст»). Вельмі дрэнна. Паўтара сутак правялі ў чаканні — і не пусцілі. Было яшчэ ў нас 40 хвілін, але чаму не пусцілі — не зразумела», — з горыччу адзначыў кіроўца рэйсавага аўтобуса да Кёльна Сяргей.
Пасажырка аўтобуса Маргарыта не хавае свайго абурэння.
«Зараз прыедзем у Мінск. Далей трэба дабірацца ў горад, адкуль я прыехала. Трэба купіць білет, зняць гатэль — гэта ўсё звязана з пэўнымі цяжкасцямі. Білеты прапалі», — расказала жанчына, ледзь стрымліваючы эмоцыі.
Лілія з дзіцем не патрапіла дадому ў Германію, а правяла ў чарзе ў чаканні ўезду ў Польшчу паўтара сутак.
«Вельмі крыўдна. У апошнія 10 хвілін былі ўпэўнены, што пройдзем, таму што мы заехалі ўжо бліжэй да палякаў. Яны праверылі нашы пашпарты, а потым чамусьці прынялі рашэнне нас не пускаць», — расказала пасажырка. У Беларусі яе сям’я гасціла ў сваякоў.
«Вярталіся дадому ў Германію. Цяпер праз Літву паедзем», — з роспаччу дадала жанчына.
Каментары
Любы хто крытыкуе беларускую памяркоўнасць і хатаскрайнасць - гэта ідыёт альбо гэбня.
Дык што сказаць хацеў, а? Высновы якія?