У Камеруне самы стары прэзідэнт у свеце перавыбраны на новы восьмы тэрмін
Самы стары кіраўнік дзяржавы ў свеце, 92‑гадовы прэзідэнт Камеруна Поль Бія, перавыбраны на новы сямігадовы тэрмін.
Бія набраў 53,66% галасоў, паведамляе Бі-бі-сі.
За час перадвыбарнай кампаніі Бія правёў толькі адзін мітынг. Дзесяць дзён кампаніі ён правёў у Еўропе, дзе знаходзіўся з прыватным візітам.
Патэнцыйна моцнага суперніка, лідара апазіцыі Марыса Камто, у ліпені да выбараў не дапусцілі. Гэтае рашэнне было пацверджана Канстытуцыйным судом, але многія ў краіне ўспрынялі яго як хітрасць, каб прыбраць канкурэнта. Пасля мінулых выбараў у 2018 годзе Камто заяўляў пра сваю перамогу і ладзіў масавыя пратэсты.
Бія займае пасаду прэзідэнта Камеруна з 1982 года. Пасля адмены абмежавання на колькасць прэзідэнцкіх тэрмінаў у 2008 годзе ён атрымаў магчымасць балатавацца неабмежаваную колькасць разоў. У выпадку перамогі ён застанецца ва ўладзе да 99 гадоў. Пытанні пра стан здароўя Бія рэгулярна становяцца прадметам грамадскага абмеркавання, асабліва пасля яго 42‑дзённай адсутнасці летась. Улады тады заявілі, што ён адчувае сябе добра, і забаранілі публічнае абмеркаванне гэтай тэмы, спасылаючыся на меркаванні нацыянальнай бяспекі.
Каментары