У Барысаве невядомы раскідвае «мармеладкі» з рыбалоўнымі кручкамі — ёсць загінулыя жывёлы
У рэдакцыю «Мінскай праўды» звярнулася валанцёр Аляксандра з Барысава. Яна распавяла гісторыю, якая разгортваецца ў новым раёне горада — Лядзішча-2. Невядомы раскідвае пачастункі з рыбалоўнымі кручкамі ўнутры.
Два сабакі выжылі цудам. Яшчэ адзін — не.
Жанчына гуляла з вазком. Двухмесячнае дзіця спала. Побач на павадку ішоў коргі. Раптам сабака заўважыў нешта яркае на зямлі.
«Нейкая жэлацінка, мармеладка», — падумала Крысціна і інстынктыўна ўзяла гадаванца на кароткі павадок. А потым прыгледзелася. Унутры празрыстай масы быў маленькі, добра схаваны рыбацкі кручок.
Крысціна даведалася пра гэтую небяспеку не выпадкова. За некалькі дзён да таго, як сама натрапіла на атруту, яна пазнаёмілася ў двары з маладым чалавекам. У яго было дзве сабакі пароды джэк-расэл-тэр’ер — маці і шчанюк.
Звычайная прагулка. Звычайныя сасіскі, якія нехта акуратна расклаў на газоне. Сабакі з’елі. Маці загінула. Шчанюк выжыў цудам — паспеў вырваць кручок.
— Хлопец распавядаў, што яго дзевяцімесячны джэк-расэл вырваў рыбацкі кручок. Ён, вядома, пацярпеў, яго вазілі да ветэрынара, але, на шчасце, выжыў, — перадае словы Крысціна. — А яго маці не ўдалося выратаваць.
Але вернемся да Крысціны і яе коргі. Да таго страшнага дня, калі яна знайшла кручкі ў «мармеладках», сабака ўжо паспеў пацярпець.
— Мы вярнуліся дадому пасля дня нараджэння сястры. Зайшлі ў кватэру — пах быў проста жахлівы, — успамінае Крысціна. — Не проста пах фекалій. Сабака «нагадзіў» усюды. Але самае страшнае — смярдзела хіміяй.
Крысціна праверыла ўсе шафы. Бытавая хімія была закрытая, доступу ў сабакі не было.
— Ветэрынары сказалі: моцнае хімічнае атручванне. Сабака з’еў нешта на вуліцы, — тлумачыць дзяўчына.
Два-тры дні кватэра была прасякнутая гэтым «хімічным» пахам. Два-тры дні коргі змагаўся за жыццё: не мог ні піць, ні есці, ні рухацца, яго трэсла. Выжыў цудам.
Крысціна ўжо ведала гісторыю пра джэк-расэл-тэр’ераў. Таму, калі ўбачыла на зямлі яркую «жэлацінку», насцярожылася.
— Я не ведаю, як я гэта заўважыла. Сама ў шоку. Іду, гляджу — нешта яркае. Падумала: мармеладкі, — распавядае яна.
Узяла сабаку на кароткі павадок. Падышла бліжэй. А ўнутры — кручкі. Акуратна схаваныя, нібыта нехта спецыяльна ўціскаў іх у салодкую масу. Сабрала гэтыя «ласункі» ў пакет.
Валанцёр Аляксандра, якая паведаміла пра гісторыю, удакладніла: «У міліцыю ўжо патэлефанавалі. Будзе заведзена справа».
Пакет з атрутай Крысціна спачатку выкінула ў вулічную сметніцу — пабаялася несці дадому, дзе маленькае дзіця. Але потым перадумала і папрасіла мужа дастаць яго: «Няхай ляжыць на балконе. Раптам міліцыі спатрэбіцца».
У Барысаўскім РУУС пацвердзілі: заява прынята.
— Па гэтым факце праводзіцца праверка. Супрацоўнікі міліцыі апытваюць магчымых сведкаў, аглядаюць прылеглую тэрыторыю, — паведамілі ў органах.
У міліцыі таксама заклікалі грамадзян быць уважлівымі і пры выяўленні падазроных прадметаў неадкладна паведамляць па тэлефоне 102.
— Я вас вельмі прашу, распаўсюдзьце гэтую інфармацыю. Бо вельмі страшна бачыць свайго гадаванца ў канвульсіях з пенай. Калі ўся кватэра забруджаная. Сабака не можа ні піць, ні есці, ні рухацца. А проста памірае, — кажа Аляксандра.
Цяпер чытаюць
Лукашэнка нервова пракаментаваў візіт Ціханоўскай у Кіеў13
Каментары