Былая палітзняволеная журналістка Ларыса Шчыракова запрашае на этнафотасэты ў строях са стогадовай гісторыяй ФОТЫ
Ларыса Шчыракова праводзіць этнафотасэты ў Беластоку. Дзякуючы яе ўласнай калекцыі нацыянальных строяў, вывезеных з Беларусі, кожны мае магчымасць прымерыць на сабе гісторыю.
Этнафотасэты Ларыса пачала арганізоўваць яшчэ ў Беларусі. Стварыла спецыяльную здымачную зону на сваім падворку ў Гомелі, зарэгістравалася ў якасці індывідуальнай прадпрымальніцы. У 2021‑м жанчына публічна аб’явіла, што сыходзіць з журналістыкі (крок быў вымушаны з улікам распачатага палявання на незалежных карэспандэнтаў). Апошнімі яе кліентамі на радзіме сталі супрацоўнікі ГУБАЗіКа — яна замовілі ў Ларысы фотасесію, каб у працэсе затрымаць.
У выніку Ларысу Шчыракову асудзілі на 3 гады і 6 месяцаў калоніі па артыкулах аб садзейнічанні экстрэмісцкай дзейнасці і дыскрэдытацыі Беларусі. А ў верасні 2025-га, амаль праз тры гады зняволення, дэпартавалі з краіны разам з яшчэ 50 палітвязнямі.
Цяпер журналістка жыве ў Беластоку і там жа прапаноўвае паслугу правядзення этнафотасэтаў — гэта могуць быць як партрэтныя здымкі, так і сямейныя з love story.
Ва ўласнасці ў фатографкі — багатая калекцыя народных вышыванак, намітак, ручнікоў, абрусаў, посцілак, старадаўніх побытавых рэчаў з Гомельшчыны, якія яна збірала па вёсках і барахолках. Рэчы паступова давозяць да яе з Беларусі, але ўжо цяпер сярод усіх гэтых скарбаў кожны знойдзе нейкі строй для сябе, каб надзець яго і, магчыма, адчуць тое, што адчувалі нашы продкі.
«У мяне каля 20 жаночых сарочак і яшчэ 10 мужчынскіх. Ёсць тры шарсцяныя андаракі і калышкі, фартухі. Гэта ўсё аўтэнтычныя рэчы, якім па 80‑100 гадоў», — расказвае Ларыса.
Зараз Ларыса чакае дакументы разам з афіцыйным дазволам на працу, і калі атрымае яго, плануе стартаваць у фотасесіях з коштам 50 еўра, што вельмі даступна па польскіх мерках.
Пакуль жа кожны жадаючы можа дамовіцца з Ларысай на этнафотасэт за данат. Звязацца з ёй можна ў інстаграме.
Цяпер чытаюць
«Ты ў нас у Беларусі!» — «Я маму тваю я*аў». Госцю з Алтая не спадабалася заўвага за кінуты ў цэнтры Мінска недакурак35
Каментары