Суд у Варшаве 28 кастрычніка разгледзіць апеляцыю паводле справы забойцы беларускі Лізы Герцэн. У студзені Дарыян С. быў асуджаны на пажыццёвае зняволенне за згвалтаванне і забойства, аднак абарона падала апеляцыю.
Суд разглядае апеляцыю Дарыяна С., паколькі абарона спрабуе давесці, што абвінавачваны быў недастаткова старанна даследаваны на прадмет наяўнасці свядомасці, а працэс нібыта прайшоў занадта хутка — прысуд быў вынесены менш чым праз год пасля забойства, піша «Белсат».
Пры вынясенні прысуду ў студзені 2025 года суд прыйшоў да высновы, што Дарыян С. дзейнічаў спакойна і разважліва — пасля здзяйснення злачынства адышоў упэўнена, забраўшы толькі каштоўныя рэчы Лізы. Дарыян С. прызнаў сябе вінаватым, але заявіў, што не хацеў забіваць Лізу.
Тым не менш, прэс-сакратар акруговай пракуратуры Варшавы Пётр Антоні Скіба паведаміў «Белсату» пасля суда ў студзені, што вырак Акруговага суда Варшавы не канчатковы: «Калі будзе пададзеная апеляцыя, то прысуд стане канчатковым пасля таго, як апеляцыя будзе разгледжаная, а вышэйшы суд зацвердзіць прысуд».
Напад на беларуску Лізу адбыўся ў цэнтры Варшавы ў ноч на 25 лютага 2024 года. Дарыян С. пацвердзіў версію следства — ён згвалціў дзяўчыну і спрабаваў яе задушыць. Затым ён проста кінуў Лізу без прытомнасці на вуліцы, забраўшы яе банкаўскія карткі і тэлефон.
Раніцай дзяўчыну знайшоў вартаўнік, які выклікаў хуткую дапамогу і паліцыю. Лізу шпіталізавалі ў крытычным стане, праз шэсць дзён яна памерла.
Амаль адразу пасля нападу быў затрыманы Дарыян С., якому на той момант было 23 гады.
У ягонай кватэры знайшлі балаклаву і нож, якія выкарыстоўваліся пры нападзе на Лізу, а таксама скрадзеныя ў яе рэчы.
Каментары