У цэнтры Каракаса адкрылі манумент работы класіка беларускае скульптуры Анатоля Анікейчыка. Гэты помнік Фідэлю Кастра — копія. Піша Сяргей Харэўскі.
У цэнтры Каракаса адкрылі манумент работы класіка беларускае скульптуры Анатоля Анікейчыка. Гэты помнік Фідэлю Кастра — копія.
Арыгінал помніка, створаны ў 1973 годзе, можна пабачыць у Нацыянальным мастацкім музеі. Летуценны лідэр рэвалюцыі, яшчэ малады і энергічны, глядзіць у неба, у недасяжную будучыню.
Хоць сам Анікейчык памёр у 1997 годзе, яго творчы даробак і дасёння вызначае шлях беларускай скульптуры. Кожны ведае яго помнік Янку Купалу ў Мінску. Альбо мемарыяльны комплекс «Прарыў» пад Вушачамі ці помнік Гастэлу ў Радашковічах.
Або яго «Юнацтва», што ўпрыгожвае сквер ля Чырвонага касцёла. Аголеныя постаці дзяўчыны і дзецюка імкнуць насустрач адно адному срозь вадзяныя струмені. Калі б давялося тлумачыць пануючы мастацкі метад у краіне сацыялістычнага рэалізму, гэтыя творы для прыкладу не надаліся б. Ужо тады за Анікейчыкам замацавалася слава нонканфарміста.
Ён бываў на Кубе ў 1970-я, асабіста сустракаўся з Кастра. «Востраў Свабоды» натхніў майстра на стварэнне яскравых вобразаў Чэ Гевары і Фідэля. Яны прасякнутыя гераічнай патэтыкай. Мо таму ім не знайшлося месца на плошчах брэжнеўскай эпохі — савецкія правадыры не вытрымлівалі параўнання.
Дый цяпер — на фоне гламурных мануменцікаў і скульптурак, што робяцца ў Беларусі ў наш час, дэкарытыўных постацяў святых і князёў — маштаб Анікейчыка вялізарны, эпічны.
Па той бок Атлантыкі ўжо стаіць яго твор — бюст Янкі Купалы ў Араў-парку ў Нью-Ёрку... Кастра паставяць у цэнтры Каракаса, ля будынка Нацыянальнай Асамблеі.
А яшчэ дзве скульптурныя копіі бюста Аб’яднаная сацыялістычная партыя Венесуэлы падорыць Гаіці. Яшчэ адна копія будзе пастаўленая ў Нацыянальнай галерэі мастацтваў Вэнесуэлы.
Героі Лацінскай Амерыкі дачакаліся свайго часу.
А яшчэ ж у беларускіх зборах перахоўваюцца творы Анікейчыка, прысвечаныя героям нацыянальным — Кастусю Каліноўскаму, Валянціну Ваньковічу. Мо і ім калі знойдзецца месца на плошчах.Калі не ў нашай краіне, то мо дзе яшчэ...
Каментары