28‑гадовай беларусцы пасля жудаснай аварыі ў Тайландзе не могуць аказаць дапамогу — няма патрэбнай крыві
У Тайландзе пасля перавароту экскурсійнага аўтобуса ў рэанімацыі апынулася 28‑гадовая беларуска Настасся Ясюкевіч. Ён тэрмінова патрэбны донары з рэдкай для Тайланда групай крыві — трэцяя адмоўная, піша «Маскоўскі камсамолец».
Аварыя здарылася 6 лістапада ў правінцыі Канчанабуры на маршруце да ракі Квай, экскурсійны аўтобус з турыстамі перакуліўся і зваліўся з узвышша. Пацярпелі грамадзяне Расіі і Беларусі, два чалавекі трапілі ў рэанімацыю (усяго ў спісе тых, хто трапіў у бальніцу, было 12 чалавек — так можна меркаваць з фота спісу, якое выклалі ў інтэрнэт).
Па словах валанцёраў, цяпер праца хірургаў у шпіталі спынілася. У банку крыві шпіталя пуста.
У 28‑гадовай беларускі шматлікія пераломы — рэбры, скула, пазваночнік. Жанчыне выдалілі селязёнку і жоўцевы пузыр.
«Самы моцны ўдар прыйшоўся на левы бок — людзі, якія там сядзелі, пацярпелі мацней за астатніх. Насця, наша сяброўка, знаходзілася з левага боку…», — расказваў пра яе «Анлайнеру» мужчына, які знаходзіўся ў тым аўтобусе.
«Хуткая, дарэчы, прыехала вельмі хутка, цягам трох хвілін. Мы з Насцяй паехалі ў найбліжэйшую бальніцу. Яна знаходзілася, мякка скажам, у нейкай глухмені, МРТ там не было. Тады Насцю перанакіравалі ў найбліжэйшы «райцэнтр». Я паехаў з ёй, бо трохі ведаю англійскую.
Бальніца аказалася дзяржаўнай, там Насцю прынялі, зрабілі КТ, МРТ і гэтак далей. Выявілася, што ў яе зламаныя некалькі рэбраў і з аднаго, і з другога боку. Таксама разрыў селязёнкі, нейкія пашкоджанні печані, а яшчэ зламаны дзясяты пазванок ў грудным аддзеле.
Насці тэрмінова патрэбная была аперацыя па выдаленні селязёнкі. Паколькі я быў адзіным, хто ведае Насцю, з мяне ўзялі згоду на правядзенне аперацыі. Пасля аперацыі яе паклалі ў інтэнсіўную тэрапію, і там яна дагэтуль. Мы наведваем яе кожны дзень. Ёй робіцца лепш. Лекары кажуць, што стан стабільны, больш аперацыя не патрэбная. Але пачынаецца доўгае аднаўленне», — казаў раней яе знаёмы.
Пасля аварыі Настасся страціла шмат крыві, піша «Маскоўскі камсамолец». Па словах Святланы Шарстабоявай, якая дапамагае рускамоўным у Тайландзе, у банку крыві бальніцы пуста, запасы вычарпаны, праца хірургаў фактычна спыненая. Тым часам дзяўчыне патрабуецца экстранная аперацыя і пераліванне крыві.
Святлана просіць адгукнуцца донараў з трэцяй адмоўнай групай крыві, якая рэдка сустракаецца ў Тайладзе.
У фэйсбуку можна пабачыць аб'явы аб тым, што для Настассі шукаюць донараў крыві.
У Настассі пяцігадовы сын. Бацькі пацярпелай таксама шукаюць чалавека, які змог бы аказваць догляд у палаце, і гатовы аплаціць яго працу.
Раней у МЗС паведамлялі, што пацярпелая беларуска знаходзіцца пад наглядам дактароў у стабільным стане і атрымлівае неабходную медыцынскую дапамогу.
Каментары