Візіт Ліянэля Месі ў Індыю абярнуўся масавымі беспарадкамі. У Калькуце фанаты выйшлі з-пад кантролю пасля кароткага з’яўлення аргенцінскай зоркі на стадыёне Salt Lake Stadium, разлічаным прыкладна на 85 тысяч гледачоў, піша Times of India.
Гэта быў першы пункт тура Месі па Індыі адразу пасля яго перамогі ў MLS. Яшчэ да прыезду футбаліста ў краіне яму ўсталявалі 21‑метровы помнік, але сам старт турнэ пайшоў зусім не па плане.
Паводле даных індыйскіх СМІ, абход трыбун давялося перапыніць з-за пагроз бяспецы: у бок поля пачалі ляцець бутэлькі, і Месі тэрмінова вывелі пад аховай. Пасля гэтага сітуацыя рэзка абвастрылася. На відэа з сацыяльных сетак бачна, як гледачы вырывалі крэслы, выбягалі на газон, зрывалі банеры і ламалі рэкламныя канструкцыі.
«Вакол Месі былі толькі палітыкі і акторы. Тады навошта нас увогуле запрасілі? Мы заплацілі 12 тысяч рупій (больш за сто еўра) і нават не ўбачылі яго твару», — заявіў адзін з заўзятараў Times of India.
Дадатковае абурэнне выклікала тое, што частка афіцыйных асоб і палітыкаў, паводле слоў відавочцаў, апынулася бліжэй да футбаліста, чым звычайныя гледачы. З-за перапоўненых трыбун і сур’ёзных праблем з бяспекай Месі пайшоў са стадыёна раней, чым планавалася, так і не паразмаўляўшы з большасцю фанатаў.
Каментары