Вынесены прысуд начальніцы з Аршанскай санстанцыі за хабары. Яна давала станоўчыя заключэнні па прадуктовых крамах, дзе было брудна
Стаў вядомы прысуд загадчыцы аддзялення гігіены харчавання ў Оршы Таццяне Харытонавай.
Не называючы імя, прэс-служба абласнога суда паведаміла, што жанчыне паставілі ў віну два выпадкі атрымання хабару, заўважыў канал «Витебск, я гуляю!»
У адным выпадку за суму каля 900 рублёў яна выдавала станоўчыя санзаключэнні па прадуктовых крамах. Пры гэтым у крамах было брудна, а прадукты захоўваліся з парушэннямі. У другім — за хабар дала дазвол пякарні, якая адкрывалася без водазабеспячэння і каналізацыі.
Жанчыне прысудзілі 4 гады пазбаўлення волі, далі 5‑гадовую забарону на кіруючыя пасады і штраф у 350 базавых велічынь. Абскарджанне ў абласным судзе не дапамагло.
Ці атрымала жанчына адтэрміноўку, не паведамляецца.
Каментары