Гродзенка паказала распакоўку з крамы: грошы аддала, а ежы амаль няма
Жыхарка Гродна апублікавала відэа з распакоўкай прадуктаў і паказала чэк: 51 рубель. Пры гэтым, паводле яе слоў, «нічога істотнага не набыта», піша BGmedia.
Як распавяла жанчына, яна завітала ў краму «Гроднахлебпрам».
У мяшку былі: паўбатона, глазураваныя абаранкі, малако, заварное печыва, скумбрыя, масла, аўсяныя шматкі (геркулес), сметанковы сыр і сухары. Каб пазбегнуць абвінавачванняў у хлусні, аўтарка адразу далучыла фота чэка, аднак гэта не спыніла спрэчак.
У каментарах людзі ў першую чаргу пачалі падлічваць выдаткі. Многія адзначылі, што палова сумы пайшла на масла і рыбу.
«Масла і скумбрыя — гэта ўжо 30 рублёў».
«Скумбрыя цяпер амаль далікатэс».
Частка каментатараў прызнаецца: хадзіць у краму стала страшна — заплаціў грошы, а пакет амаль пусты. «100 рублёў — і ўсяго адзін пакет прадуктаў», «51 рубель — гэта цяпер увогуле ні пра што», — дзеляцца карыстальнікі сваім досведам.
Знайшліся і тыя, хто раскрытыкаваў саму пакупку. Маўляў, можна было абысціся без рыбы, масла і ласункаў.
«Шмат мучнога і залішняга».
«Вы самі выбіралі кошык, у чым прэтэнзіі?»
Але ім тут жа парыравалі: чаму чалавек павінен адмаўляць сабе ў звычайных прадуктах? І з якіх часоў масла, сыр і рыба сталі раскошай?
Асабліва эмацыйнымі былі каментары паджылых людзей. Пенсіі 700—800 рублёў, паводле іх слоў, пасля аплаты камунальных паслуг і набыцця лекаў застаюцца грошы толькі на самы мінімум.
«Хутка боршч будзем есці без смятаны».
«Вясной і гэтага не будзе».
Нават прадаўцы пацвярджаюць: цэны растуць, і гэта відаць штодзень. «Я веру вам. Гэта жах, а не цэны», — напісала супрацоўніца адной з крам Гродна.
Як высветлілася, жанчына ўжо не першы раз здымае падобныя ролікі. Раней яна паказвала пакупку ў краме мясакамбіната на 11 рублёў — сухарыкі з разынкамі, кефір, клятчатка і мяккі тварог.
А паход у «Святлафор» абышоўся ёй на 85 рублёў — два віды сыру, манга, печыва, кілаграм кавы, спагеці і мыла. І зноў — «нічога не купілі».
Кожны такі ролік выклікае адно і тое ж пытанне: як жыць пры такіх цэнах? Мяркуючы з каментароў, адказу на яго ў людзей няма. Затое ёсць агульнае адчуванне: прадукты даражэюць, а даходы за імі не паспяваюць.
Цяпер чытаюць
Чаму ўлады маўчаць пра прычыны разбурэння дома ў Гомелі і якія ёсць версіі2
Каментары
А ў гэтай хаце няма чаго даці! Плускі смажаць, пірагі мажуць! Каросту труць, хлеб пякуць!