У Турцыі падчас футбольнага матча мяч трапіў у чайку. Але загінуць птушцы не далі
Падчас аматарскага футбольнага матча ў Стамбуле гульню давялося спыніць з-за нечаканага здарэння: мяч трапіў у чайку, якая пралятала над полем. Тады, забыўшыся пра гульню, футбалісты кінуліся аказваць птушцы дапамогу, паведамляе агенцтва Anadolu.
Інцыдэнт адбыўся ў стамбульскім раёне Зейцінбурну на 22‑й хвіліне сустрэчы, калі брамнік адной з каманд выпадкова збіў птушку ўдарам мяча.
Чайка ўпала на газон, і спачатку футбалісты нават не зразумелі, што здарылася. Першым зарыентаваўся капітан каманды — ён пачаў рабіць птушцы непрамы масаж сэрца. Рэанімацыя працягвалася каля дзвюх хвілін. І здарыўся цуд — праз некаторы час чайка пачала падаваць прыкметы жыцця: рухала вачыма і лапамі.
Птушцы далі вады, пасля чаго перадалі медыкам. Цяпер чайцы дапамагаюць ветэрынары: лётаць яна пакуль не можа, але ўжо ўпэўнена стаіць на лапах.
Каманда, чый гулец трапіў у чайку, у выніку прайграла матч. Аднак яе капітан адзначыў, што хоць параза і засмуціла футбалістаў, выратаванне жывой істоты было значна важнейшым за вынік у турнірнай табліцы.
Цяпер чытаюць
«Жэня пагадзіўся на будоўлю, а не ваяваць. І толькі калі выйдзе з запою!»: як прадалі ў расійскую армію жыхара Лёзна. Ахвяра не адна3
Каментары