Беларускамоўнага інжынера родам з Хойнікаў асудзілі — хутчэй за ўсё, па справе Гаюна
Аляксандр Повад ствараў праграмы для радыяцыйнага маніторынгу і працаваў у мінскім «Атамтэху». Нядаўна хлопца асудзілі па палітычным крымінальным артыкуле.
Аляксандру Поваду 29 гадоў. Ён родам з Хойнікаў Гомельскай вобласці. У 2016 годзе хлопец скончыў Мінскі дзяржаўны энергетычны каледж, а пасля паступіў у Міжнародны дзяржаўны экалагічны інстытут імя Сахарава БДУ, дзе ў 2021 годзе атрымаў дыплом медыцынскага фізіка. У дыпломнай працы хлопец распрацаваў алгарытм для вымярэння актыўнасці шматкампанентных радыёнуклідных крыніц для «Атамтэха».
На «Атамтэх» жа Аляксандр і ўладкаваўся працаваць інжынерам дазіметрычнага аддзела і праграмістам. Хлопец пісаў код на Python, C/C++, C# і JavaScript, ствараў кросплатформенныя дадаткі на Qt і распрацоўваў вэб-сістэмы ўліку радыенуклідаў. Ён таксама выкарыстоўваў машыннае навучанне для аналізу радыяцыйных даных і працаваў з праграмамі для мадэлявання выпраменьвання. З рэзюмэ Аляксандра выглядае, што ён спецыяліст высокага ўзроўню на сутыку IT і ядзернай фізікі.
У сацсетках Аляксандр часцей за ўсё каментаваў нешта па-беларуску — пра кіно, мовы, мемы. У вольны час ён рабіў унёсак у праекты з адкрытым зыходным кодам на Github.
Мінскі гарадскі суд нядаўна вынес яму прысуд паводле частак 1 і 2 артыкула 361‑4 КК (садзейнічанне экстрэмісцкай дзейнасці). Што канкрэтна стала нагодай для пераследу — дакладна невядома, але хутчэй за ўсё гэта справа Гаюна.
Аляксандру Поваду прысудзілі хатнюю хімію.
***
«Беларускі Гаюн» — маніторынгавы OSINT-праект, які быў створаны ў 2022 годзе, калі Расія праз Беларусь напала на Украіну. Праект адсочваў ваенную актыўнасць расійскіх і беларускіх войскаў, абапіраючыся на інфармацыю ад беларусаў. Каардынавала яго дзейнасць група актывістаў на чале з Антонам Матолькам.
Справа Гаюна пачалася пасля таго, як сілавікі затрымалі актывістку Паліну Зыль, якая некалькі гадоў жыла ў Беларусі ў падполлі. У яе мабільніку знайшлі спасылку на далучэнне ў бот Гаюна, якую ёй дасылалі ў самым пачатку існавання праекта. Фатальная памылка была ў тым, што спасылка была бестэрміновая. А таму сілавікі змаглі падключыцца да бота і выпампаваць адтуль усю інфармацыю. Яны атрымалі паведамленні акаўнтаў, якія пісалі ў бот, а таксама іхнія ID і імёны карыстальнікаў.
Заснавальнік Гаюна Антон Матолька адразу пасля ўзлому патлумачыў, як адбыўся выцек інфармацыі і абвясціў пра закрыццё праекта.
«Наша Нiва» — бастыён беларушчыны
ПАДТРЫМАЦЬ
Каментары