Каля Егіпта на фоне іранскага крызісу знайшлі вялікае радовішча прыроднага газу
Італьянская энергетычная кампанія ENI і ўлады Егіпта абвясцілі пра адкрыццё буйнога радовішча прыроднага газу ва ўсходняй частцы Міжземнага мора. Гэта можа дапамагчы краіне справіцца з ростам выдаткаў на энергарэсурсы на фоне вайны, звязанай з Іранам, піша Euronews.
Паводле папярэдніх ацэнак, радовішча «Тэмсах» змяшчае каля 60 мільярдаў кубічных метраў газу, а таксама каля 130 мільёнаў бараляў газавага кандэнсату. Праект рэалізуецца сумесна з кампаніяй British Petroleum праз іх супольнае прадпрыемства.
Свідравіна ўжо рыхтуецца да выпрабаванняў. Пасля гэтага плануюць бурэнне новых свідравін і будаўніцтва марской платформы, каб пачаць прамысловую здабычу.
Гэта адкрыццё адбылося ў вельмі важны момант для Егіпта. З-за канфлікту, звязанага з Іранам, пастаўкі газу з Катара і Ізраіля былі парушаныя. У выніку краіне давялося ўводзіць меры эканоміі: абмежаванні для бізнэсу, рост цэн на паліва і скарачэнне дзяржаўных выдаткаў. Штомесячныя выдаткі на імпарт газу амаль патроіліся.
Новае радовішча можа стаць для Егіпта важнай падтрымкай, а таксама дапамагчы Еўропе ў пытанні энергазабеспячэння. Аднак наколькі моцна яно паўплывае на сітуацыю, будзе залежаць ад хуткасці распрацоўкі і таго, як доўга працягнецца канфлікт.
Адзначаецца, што гэта не першае буйное адкрыццё: яшчэ ў 2015 годзе было знойдзена радовішча Зохр, якое давала надзею на поўную энергетычную самадастатковасць краіны. Але пазней Егіпет зрабіў стаўку на ролю рэгіянальнага цэнтра па перапрацоўцы і транзіце газу.
Дзядок расказаў, як паводзіў бы сябе ў сённяшняй Беларусі і што будзе далей5
Каментары