Генерал ГРУ, які курыруе дыверсіі за мяжой і якога памылкова пахавалі, усплыў у Гвінеі
Андрэй Авяр’янаў з’явіўся на цырымоніі перадачы зброі ў Гвінеі.
Генерал ГРУ, які курыруе дыверсіі за мяжой і пра гібель якога паведамляла RFI, з’явіўся на цырымоніі перадачы зброі ў Гвінеі.
Генерал ГРУ Андрэй Авяр’янаў узначальвае вайсковую часць № 29155, што адказвае за дыверсіі за мяжой. На фота з цырымоніі перадачы ваеннай тэхнікі ўзброеным сілам Гвінеі яго заўважыла «Агенцтва». У пачатку красавіка французскае радыё RFI паведамляла, што Авяр’янаў загінуў на борце нафтавага танкера Qendil («Кендыл»), які быў атакаваны ў ноч на 19 снежня 2025 года ў Міжземным моры.
Цырымонія перадачы расійскай ваеннай тэхнікі ўзброеным сілам Гвінеі прайшла ў пятніцу, паведаміла адміністрацыя прэзідэнта краіны. У цырымоніі, згодна з прэс-рэлізам, удзельнічалі прэзідэнт Гвінеі Мамадзі Думбуя, прэм’ер-міністр краіны Амаду Уры Бах і іншыя высокапастаўленыя чыноўнікі, а з расійскага боку — «старшы прадстаўнік Міністэрства абароны Расіі, які таксама з’яўляўся спецыяльным пасланнікам прэзідэнта Уладзіміра Пуціна, і пасол РФ у Рэспубліцы Гвінея».
На фота з цырымоніі бачна расійскага пасла ў Гвінеі Аляксея Папова, які стаіць па левую руку ад міністра абароны краіны Абубакара Сідыкі Камары, і Авяр’янава — ён стаіць паміж прэзідэнтам Мамадзі Думбуя і прэм’ерам Амаду Уры Бахам. На іншых фота з цырымоніі бачна, як гвінейскія чыноўнікі ў суправаджэнні Авяр’янава аглядаюць перададзеную зброю і абмундзіраванне, а таксама як Авяр’янаў выступае са зваротам.
У прэс-рэлізе гаворыцца, што Гвінея закупіла ў Расіі ваенную форму, цяжкія каскі, бронежылеты, баявыя чаравікі, сучасныя беспілотнікі і іншае абсталяванне для вядзення баявых дзеянняў, назірання і супрацьпаветранай абароны.
Адкуль з'явілася інфармацыя пра гібель Авяр'янава? У снежні каля берагоў Лівіі быў атакаваны танкер Qendil. У пачатку красавіка французская радыёстанцыя RFI са спасылкай на лівійскія крыніцы паведамляла, што на борце судна знаходзіліся каля дзесяці высокапастаўленых супрацоўнікаў расійскай разведкі, пераапранутых у маракоў. Пры ўдары загінулі два чалавекі, адзін з якіх — Авяр’янаў, сем атрымалі раненні, сцвярджалі суразмоўцы RFI.
Журналіст-расследвальнік Хрыста Грозеў назваў гэтыя паведамленні «цалкам фэйкавай гісторыяй» і напісаў, што Авяр’янаў жывы.
RFI пазней выдаліла навіну.
Каментары