Расійскі бок накіраваў усім акрэдытаваным пры МЗС дыпмісіям ноту з заклікам забяспечыць эвакуацыю супрацоўнікаў пасольстваў у Кіеве ў сувязі з папярэджаннем Міністэрства абароны Расіі пра ўдар у адказ па цэнтры ўкраінскай сталіцы ў выпадку спроб украінскіх уладаў сарваць святкаванне 81‑й гадавіны Перамогі. Пра гэта паведаміла афіцыйны прадстаўнік расійскага МЗС Марыя Захарава, піша РБК.
«МЗС Расіі настойліва заклікае ўлады вашай краіны, кіраўніцтва вашай арганізацыі з максімальнай адказнасцю паставіцца да гэтай заявы і забяспечыць загадзя эвакуацыю з горада Кіева персаналу дыпламатычных і іншых прадстаўніцтваў, а таксама грамадзян у сувязі з непазбежнасцю нанясення Узброенымі сіламі Расійскай Федэрацыі адказнага ўдару па Кіеве, у тым ліку па цэнтрах прыняцця рашэнняў, у выпадку рэалізацыі кіеўскім рэжымам сваіх злачынных тэрарыстычных задум у дні святкавання Вялікай Перамогі», — працытавала вытрымку з ноты Захарава.
Таксама расійскія дыпламатычныя прадстаўніцтвы за мяжой інфармуюць пра гэта краіны акрэдытацыі і міжнародныя арганізацыі, дадалі ў ведамстве.
«Нам добра вядома стаўленне калектыўнай заходняй меншасці да 9 Мая: яны планамерна знішчаюць савецкую мемарыяльную спадчыну, эксгумуюць парэшткі савецкіх воінаў, перапісваюць і скажаюць гісторыю. Менавіта яны, узбройваючы Украіну, з’яўляюцца саўдзельнікамі злачынных планаў кіеўскага рэжыму. Але ў дадзеным выпадку ім не павінен адмовіць інстынкт самазахавання. Мы не выступаем з пазіцыі агрэсіі, мы выступаем з пазіцыі непазбежнага адказу на агрэсію», — сказала Захарава.
Яна адзначыла, што заяву Міністэрства абароны Расіі пра магчымы адказны ўдар трэба ўспрымаць «вельмі і вельмі сур’ёзна».
4 мая Міністэрства абароны Расіі абвясціла пра перамір’е на 8—9 мая. У паведамленні гаварылася, што расійскі бок разлічвае, што Украіна рушыць услед гэтаму прыкладу. Ведамства заявіла, што ў выпадку спроб украінскага боку сарваць святкаванне 81‑й гадавіны Перамогі Узброеныя сілы Расіі нанясуць адказны масіраваны ракетны ўдар па цэнтры Кіева.
«Папярэджваем цывільнае насельніцтва Кіева і супрацоўнікаў замежных дыпламатычных прадстаўніцтваў пра неабходнасць своечасова пакінуць горад», — сказана ў паведамленні Міністэрства абароны.
Каментары