Новая хваля лясных пажараў распаўсюдзілася ў розных раёнах мацерыковай Грэцыі. Сітуацыя ўскладняецца моцным ветрам, які спрыяе хуткаму распаўсюджванню агню. У краіне праводзяцца маштабныя аперацыі тушэння пажараў і эвакуацыі жыхароў, паведамляе Reuters.
Як паведамляецца, пасля адносна спакойнага пачатку пажаранебяспечнага сезона ў Грэцыі зноў узнікла некалькі буйных асяродкаў узгарання. Асабліва складаная сітуацыя склалася ў вобласці Беотыя, дзе агонь наблізіўся да прыбярэжных населеных пунктаў.
Да барацьбы з пажарамі прыцягнутыя больш за 300 пажарнікаў, каля 90 пажарных машын і авіяцыя. З пляжу Агіас-Васіліяс па моры былі эвакуяваныя больш за 200 чалавек, яшчэ 12 чалавек вывезлі з пляжу Порта-Гермена. У апошнім населеным пункце, які знаходзіцца непадалёк ад Афінаў, агнём, паводле мясцовых уладаў, знішчана каля ста дамоў.
Грэцкія ўлады абвясцілі надзвычайны ўзровень пажарнай небяспекі ў рэгіёнах Атыка і Эўбея.
Адначасова з пажарамі ў Грэцыі складаная сітуацыя захоўваецца ў Францыі ды Іспаніі.
На паўднёвым захадзе Францыі, у дэпартаменце Жыронда, буйны пажар, які пачаўся 22 ліпеня каля Бардо і знішчыў каля 42 тысяч гектараў лесу, удалося лакалізаваць. Аднак у дэпартаменце Вар на поўдні краіны агонь зноў узмацніўся: за некалькі гадзін полымя ахапіла больш за тысячу гектараў. У выніку за ноч былі эвакуяваныя амаль 2500 чалавек.
У Іспаніі працягваецца барацьба з некалькімі буйнымі асяродкамі. Новы пажар узнік у паўночнай правінцыі Леон. У суседняй Саморы ўдалося ўзяць пад кантроль узгаранне, якое знішчыла каля 11 тысяч гектараў. Пажар у правінцыі Кастэльён, дзе выгарала амаль 10 тысяч гектараў, таксама быў лакалізаваны пасля сямі дзён барацьбы.
Паліцыя Іспаніі дапускае, што некаторыя пажары маглі быць выкліканыя наўмыснымі падпаламі. У Кастэльёне былі знойдзеныя два асобныя асяродкі ўзгарання.
Буйныя пажары ў цэнтральных рэгіёнах Іспаніі — Мадрыдзе і Авіле — удалося стабілізаваць.
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю10
Каментары