«З паднятым кузавам працягнуў рух». У Рэчыцкім раёне грузавік пашкодзіў пуцеправод пры дзіўных абставінах
ДТЗ адбылося каля чацвёртай гадзіны раніцы 31 жніўня на трасе М-10 у Рэчыцкім раёне. Паводле інфармацыі Дзяржаўтаінспекцыі, грузавік «Донфенг» рухаўся з паднятым кузавам і зачапіў ім бетонную пліту пуцеправода на дарозе Жмураўка — Гарошкаў, піша «Флагшток».
У выніку аварыі 35‑гадовы кіроўца атрымаў пераломы і быў шпіталізаваны ў рэанімацыю. Пазней стала вядома, што яго жыццю нічога не пагражае, аднак ён працягвае лячэнне ў бальніцы Рэчыцы. Сам пуцеправод таксама атрымаў значныя пашкоджанні.
Як расказала крыніца «Флагштока», знаёмая з абставінамі здарэння, усё магло пачацца з гуку, які ішоў ад кола. Кіроўца нібыта пачуў нешта падазронае, вырашыў праверыць, ці ўсё ў парадку, і падняў для гэтага кузаў. Пасля гэтага ён, паводле гэтай версіі, забыўся кузаў апусціць і працягнуў рух.
У выніку самазвал на хуткасці ўрэзаўся ў пуцеправод. Сітуацыя выглядае даволі незвычайнай, бо пры руху з паднятым кузавам аўтамабіль павінен быў стаць менш устойлівым, а ў кабіне, як мяркуецца, павінны былі спрацаваць адпаведныя сігналізатары.
Грузавік перавозіў пясок, які здабываюць у Рэчыцкім раёне. Самазвал належыць прыватнаму прадпрыемству, якое перамагло ў тэндары на пастаўку пяску для аднаго з аб’ектаў.
Наколькі сур’ёзныя пашкоджанні атрымаў пуцеправод, афіцыйна пакуль не паведамляецца.
Каментары