Дарога дадому, якая пакуль вядзе праз фронт. У Кіева-Пячэрскай лаўры паказваюць гісторыю Палка Каліноўскага
Ідэя афармлення ўзнікла пасля чарговага пераезду палкавых складоў: рэчы ехалі ў скрынях з аднаго месца ў другое, разам з імі — здымкі і ўспаміны. Цяпер гэтыя скрынкі сталі часткай экспазіцыі.
У адной кардоннай скрыні — фота ўказальніка «Пакроўск» з украінскім і бел-чырвона-белым сцягамі. На яе створках — разбіты дом і кола агляду, якое застыла над горадам. На іншай скрынцы — усмешлівы баец у шлеме. Побач ад рукі напісана яго імя: «Молакаў Мікола Мікалаевіч». А вось фотаздымак ваяра з пазыўным «Альгерд», палкавыя шаўроны і бел-чырвона-белы сцяжок.
Гэтыя скрынкі цяпер стаяць у Вялікай Лаўрскай званіцы ў Кіеве і захоўваюць гісторыю людзей, якія больш за чатыры гады не могуць вярнуцца дадому.
Так у Кіеве паказваюць «Доўгае падарожжа дадому» — фотавыставу пра беларускіх добраахвотнікаў Палка імя Кастуся Каліноўскага. Ідэя афармлення ўзнікла пасля чарговага пераезду палкавых складоў: рэчы ехалі ў скрынях з аднаго месца ў другое, разам з імі — здымкі і ўспаміны. Цяпер гэтыя скрынкі сталі часткай экспазіцыі.
На больш чым 150 здымках — баявая праца ваяроў, трэніроўкі, іх побыт на пазіцыях, асабістыя міні-гісторыі байцоў Палка, якія раскрываюць іх асобы. Вось вайсковы медык сочыць за маніторам у машыне. Вось баец сядзіць на зямлі побач з сабакам. На іншым кадры вайсковец падносіць да вуснаў трубу сярод зімовага пейзажу. Побач — дым над пасёлкам, агонь і людзі ў акопах. Выстава дае пабачыць тых, чые твары звычайна хавае маска, праз іх працу і кароткія хвіліны паміж ёй.
Па падлозе залы пазначаны рэгіёны, дзе ваявалі беларусы. Маршрут вядзе ад Бучы і Ірпеня праз Севераданецк, Бахмут і Часаў Яр да Харкаўшчыны і Запарожжа. Глядач можа прайсці гэты маршрут за некалькі хвілін. Людзям жа на фотаздымках на яго спатрэбіліся гады і дарога яшчэ не скончылася.
Рота беларускіх добраахвотнікаў з’явілася ва ўкраінскім войску ў пачатку сакавіка 2022 года. Пазней быў сфармаваны батальён імя Кастуся Каліноўскага, які вырас у полк. Для гэтых беларусаў абарона Украіны стала таксама барацьбой за магчымасць аднойчы вярнуцца ў свабодную Беларусь. Але гэтае «аднойчы» зацягнулася ўжо на пяты год.
Гісторыю палка спрабуюць захаваць праз здымкі. Летась у варшаўскім Музеі Вольнай Беларусі паказвалі «Праз фотаплёнку. Штодзённасць ваяроў» — здымкі байца Яўгена Жураўскага, «Салама», пра побыт і вучобу паміж баямі. Сёлета выстава «Доўгае падарожжа дадому» спачатку прайшла ў Запарожжы, а цяпер прыехала ў Вялікую Лаўрскую званіцу Кіева-Пячэрскай лаўры ў Кіеў. Фільм Палка з кадрамі бою у чэрвені атрымаў узнагароду ў конкурсе «Вайна ў аб’ектыве».
Каментары
Талантливый человек!