У Кыргызстане аднавілі пошукі зніклага беларуса. Двух альпіністаў ужо знайшлі мёртвымі
Шукаюць Мікалая Свірыдава
У пачатку жніўня пасля ўзыходжання на пік Курумды ў Кыргызстане знікла група з трох альпіністаў. Сярод іх былі двое беларусаў: 43‑гадовы Максім Палянскі і 60‑гадовы Мікалай Свірыдаў, а таксама 37‑гадовы Сяргей Рубцоў з Літвы.
Гэтая пошукавая аперацыя прыцягнула шмат увагі: за развіццём падзей сачылі тысячы людзей, хоць надзвычайныя здарэнні ў гарах адбываюцца рэгулярна.
На жаль, цуду не здарылася: двух альпіністаў — Максіма і Сяргея — знайшлі мёртвымі, іх целы ўжо апазналі блізкія.
Работы па пошуку Мікалая прыпынілі з-за высокай небяспекі: у месцы меркаванага падзення бесперапынна сыходзяць лавіны і адбываюцца каменяпады. Але, як стала вядома сёння, аперацыю аднавілі.
Як паведамілі Onliner.by удзельнікі пошукавых работ, паводле распараджэння міністра па надзвычайных сітуацыях Кыргызскай Рэспублікі ў работах удзельнічаюць пяць байцоў Асобнага рэспубліканскага выратавальнага атрада. Яны знаходзяцца ў перадавым базавым лагеры.
— Супрацоўнікі МНС Чон-Алайскага раёна ў колькасці чатырох чалавек забяспечылі транспарціроўку тэхнікі і грузаў для базавага лагера. Гаворка ідзе пра апошнія 12 кіламетраў ад дарогі, дзе няма ні каляіны, ні сувязі. Гэты ж участак ведамства забяспечвала ў жніўні.
Работы на схіле выконваюць прыцягнутыя штабам аператары дронаў кампаніі Evernest і альпіністы. Выдаткі на гэтым этапе і адказнасць за яго правядзенне нясе штаб аперацыі. Кансультант аперацыі — альпініст Андрэй Ярохін.
Гэтаму этапу папярэднічалі два тыдні падрыхтоўкі. Міжнародны штаб аперацыі вёў маніторынг надвор’я ў раёне па спадарожнікавых здымках. Для гэтага выкарыстоўвалася праграмнае забеспячэнне, распрацаванае для штаба Дзмітрыем Разумоўскім.
Колькасць снегу, які выпаў за гэты перыяд, і хуткасць яго раставання дазваляюць меркаваць, што аб’екты на схіле засыпаныя нязначна. Палётнае заданне для дрона склалі нанова з улікам абставінаў, устаноўленых на другім этапе аперацыі. Яно ўключае аблёт хрыбта, схілаў і кулуараў.
12 верасня група выехала з Оша і злучылася з супрацоўнікамі МНС непасрэдна ў пункце пачатку маршруту, за Сары-Ташам. Адтуль у базавы лагер уючным транспартам даставілі рыштунак: прадукты, два генератары, дроны, зарадную станцыю і бівуачнае абсталяванне.
Штаб аперацыі дзякуе Міністэрству па надзвычайных сітуацыях Кыргызскай Рэспублікі, Асобнаму рэспубліканскаму выратавальнаму атраду і МНС Чон-Алайскага раёна за садзейнічанне на ўсіх этапах пошукаў.
Цяпер чытаюць
28‑гадовага авіятара асудзілі на 13 гадоў калоніі: «здрада дзяржаве» за перапіску з аднакурснікамі з УСУ6
28‑гадовага авіятара асудзілі на 13 гадоў калоніі: «здрада дзяржаве» за перапіску з аднакурснікамі з УСУ
Небарака з Ляхавічаў знік «на СВА» ўжо на трэці дзень, а ў барацьбе за грабавыя счапіліся сястра, сужыцелька і жонка — з чатырма дзецьмі, але чужымі88
Каментары