23 жніўня быў зарэгістраваны саюз «За мадэрнізацыю». Мэтай новай арганізацыі з’яўляецца садзейнічанне пераходу Рэспублікі Беларусь да сучасных формаў арганізацыі эканамічнай, сацыяльнай і культурнай сфер, а таксама падрыхтоўка беларускага грамадства да маючых адбыцца зменаў.
У раду аб’яднання ўвайшлі дырэктар прыватнага прадпрыемства Віктар Яўмеенка, эканаміст Аляксандр Лукашэвіч, філосаф Ігар Драко, навуковец Канстанцін Лукашоў, прадпрымальнік Аляксандр Лыкшын. На першым пасяджэнні рады быў абраны яго старшыня. Ім стаў палітык, кандыдат у прэзідэнты Беларусі Алесь Міхалевіч.
Каментуючы сваё абранне лідэрам саюза «За мадэрнізацыю» і сам факт стварэння такога аб’яднання, Алесь Міхалевіч адзначыў: «Беларусь мае патрэбу ў экстранай мадэрнізацыі. Нам неабходна выйсці на іншы ўзровень адносін бізнэсу і ўлады, стымуляваць канкурэнцыю на ўнутраным рынку, рабіць стаўку на новыя тэхналогіі, прыцягваць інвестыцыі пад навукаёмістыя тэхналогіі і развіваць сферу паслуг. Гэта адзіны выхад з няпростага становішча, у якім апынулася эканоміка нашай краіны. Але для таго, каб адбыліся рэальныя змены ў эканоміцы, трэба мадэрнізаваць і беларускае грамадства. А гэта, у сваю чаргу, патрабуе рэфармавання сістэмы адукацыі, стымулявання асабістай ініцыятывы грамадзян, абароны правоў асобы, пэўнай дэцэнтралізацыі ўлады і павышэння ролі самакіравання».
Аб’яднанне будзе дзейнічаць на сталай аснове. Паводле Алеся Міхалевіча, саюз «За мадэрнізацыю» ў бліжэйшы час мае намер ініцыяваць шэраг праектаў.
Цяпер чытаюць
Рыта Дакота ўпершыню распавяла, за што беларускія сілавікі схапілі яе маці ў 2022 годзе4
Каментары