Майстар-клас для прафесіяналаў

У Музычным тэатры завяршыўся кастынг для мюзікла «Блакітная камея». Падзея цікавая і нават знакавая — адкрыты конкурс на ролі ў спектаклі. Піша Юлія Андрэева.

Звычайна акцёраў у нашых тэатрах прызначаюць без ніякага адбору, нават калі іх запрашаюць з іншых калектываў. Cітуацыя змянілася, калі ў Мінск дэсантавалася брыгада пастаноўшчыкаў «Блакітнай камеі». Ім дазволілі правесці вольны… ці хіба амаль вольны кастынг, прычым не ў якасці прыватнай антрэпрызы, а пад дахам акадэмічнага дзяржаўнага тэатра.

Па першым уражанні, такі адыход ад жорсткіх адміністратыўных правіл стаўся магчымы дзякуючы новаму, больш ліберальнаму кіраўніцтву — і ў Музычным тэатры, і ў Міністэрстве культуры. Аднак высветлілася, што прынцыповая дамоўленасць наконт пастаноўкі «Блакітнай камеі» была дасягнутая яшчэ пры старым кіраўніцтве.

Сам кастынг адбываўся, як у галівудскім кіно. Звыш 800 удзельнікаў, сярод якіх былі і прафесійныя акцёры, і студэнты, і нават кіроўца грузавіка. У адборачнай камісіі, апрача аўтара і прадзюсера «Блакітнай камеі» Кіма Брэйтбурга, была яго жонка Валерыя Брэйтбург (вядомая ў Маскве выкладчыца эстраднага вакалу), а таксама харэограф і рэжысёр Мікалай Андросаў.

Адбор праходзіў у рэпетыцыйнай зале Музычнага тэатра. Удзельнікаў запускалі ўнутр групамі па 8-10 чалавек. Танцоры найчасцей прыходзілі гуртам. Ім давалі выканаць падрыхтаваны нумар, а потым па чарзе ставілі ля балетнага станка і правяралі гнуткасць ставаў.

Спевакоў выстройвалі ў шарэнгу і адсейвалі паводле выгляду.

20 верасня на прэс-канферэнцыі абвясцілі вынікі. Прынамсі, мусілі абвясціць, бо Кім Брэйтбург усё яшчэ не ўпэўнены ў сваім выбары і адкрыты для новых прапаноў. Вядома толькі, што галоўную жаночую ролю будзе іграць Ірына Дарафеева, а таксама студэнтка 4-га курса Універсітэта культуры Кацярына Муратава і артыстка Музычнага тэатра Ілона Казакевіч.

Прычым вядома, што іграць прэм’еру будзе сп-ня Дарафеева, якая не мае якога-небудзь тэатральнага вопыту.

Пастаноўка фінансуецца ў значнай меры з дзяржаўнай кішэні. Задзейнічаныя таксама сродкі Музычнага тэатра (дзяржаўнай установы) і асабістыя сродкі Кіма Брэйтбурга. Ці будзе праект рэнтабельным, пакажа час. Але наконт рэнтабельнасці ёсць сур’ёзныя сумневы. Дагэтуль усе пастаноўкі мюзіклаў у Мінску былі стратнымі. Да таго ж, сам сюжэт з княжной Тараканавай, графам Арловым і царыцай Кацярынай для беларусаў чужы і наўрад ці прывабны. А выдаткі на шыкоўныя дэкарацыі і 200 гістарычных касцюмаў будуць вялізныя.

Што датычыцца іншых персанажаў, апрача княжны, дык выканаўца галоўнай мужчынскай ролі пакуль толькі адзін — Зміцер Якубовіч. Нібыта ёсць яшчэ двое, але іх імёны Кім Брэйтбург не называе. Наадварот, падкрэслівае, што да 5 лістапада можна звяртацца ў тэатр з прапановай сваіх паслуг. І, думаецца, гэта вельмі добры шанец для беларускіх артыстаў. Кім Брэйтбург і яго каманда — гэта прафесіяналы, якія валодаюць тэхналогіяй пастаноўкі мюзіклаў, і сам пастановачны працэс — свайго роду майстар-клас. Не варта ўпускаць такую магчымасць. Бо толькі праз вывучэнне чужога можна вырасціць сваё.

• 0
• 0
• 0
• 0
• 0
• 0
• 0
• 0