20 кастрычніка на Сядзібе БНФ мае адбыцца прэзэнтацыя кнігі вершаў Сяргея Патаранскага «Сэрца Бога – Беларусь».
20 кастрычніка на Сядзібе БНФ (вул.Машэрава, 8) мае адбыцца прэзэнтацыя кнігі вершаў Сяргея Патаранскага «Сэрца Бога – Беларусь».
Сяргей Патаранскі нарадзіўся ў 1976 г. у Менску, вучыўся ў мастацкай школе-каледжы №26, затым у Нацыянальным гуманітарным ліцэі імя Якуба Коласа, дзе пазьней выкладаў творчую спэцыялізацыю ў кірунку літаратурнай і тэатральнай работы. Пасьля ліцэю вучыўся на журфаку БДУ, затым у Беларускай Акадэміі Мастацтваў. Сяргей Патаранскі – прафэсійны рэжысэр, займаецца публіцыстыкай, прозай, перакладае з лаціны, ангельскай, польскай, расейскай, украінскай моваў, але найбольш знаны як паэт.
Сяргей Патаранскі сябе прылічае да пакаленьня «нацыянальных інтэлектуалаў Беларусі (канца 90-х гг. – пачатку ХІХ ст.). У інтэрвію Белапану паэт заявіў наступнае: «Кніга адкрывае мой сур’ёзны паэтычны праект Belarusing, які ўвасабляе ўсю духоўную прастору Беларусі ў шырокім сэнсе. Гэта кніга ёсьць справаздачай некаторых маіх найлепшых набыткаў у кірунку грамадзка-філязофскай паэзіі. У кнігу ўвайшло маё паэтычнае разуменьне гісторыі Беларусі, Беларусі як этнасу, і, безумоўна, адносінаў чалавека да Бога. Увасабленьне беларускай духоўнасьці – гэта асноўная задача маёй кнігі».
Паводле словаў Патаранскага, палова кнігі была скарочная рэдактарам Міхасём Тычынам з прычынаў паліткарэктнасьці. Камэнтуе паэт: «Можа быць, і Смаленск для кагосьці небеларускі горад, але для мяне гэта адна з гістарычных беларускіх сталіцаў. Можа быць, для кагосьці Вільня – гэта аб’ектам палітычнага і духоўнага гандлю, але для мяне гэта сталіца Беларусі. Мае выказваньні маюць адыёзны характар, але я заўжды імкнуўся да поўнай праўды і свае задачы бачу, як адкрыцьцё духоўна-гістарычнага кантэксту для сучасных і будучых пакаленьняў Беларусі».
Удзел бяруць паэтка і бардэса Валерыя Кустава, паэты Алесь Сьпіцын, Наталя Кучмель, Галіна Дубянецкая.
Каментары