Разглядаецца пытанне аб стварэнні ў Беларусі нацыянальнага навукова-тэхналагічнага парку ў сферы нанабіятэхналогій і фармацэўтыкі «Біяград».
Пра гэта, паводле інфармацыі прэс-службы ўрада, паведаміў прэм’ер-міністр Міхаіл Мясніковіч 1 чэрвеня падчас наведвання Інстытута біяарганічнай хіміі НАН Беларусі.
Стварэнне такога парку дазволіць сфарміраваць у Беларусі новы кластар у сферы нанабіятэхналогій і фармацэўтычнай прамысловасці, мяркуюць ва ўрадзе.
«Гэтая тэма застаецца на парадку дня, — сказаў прэм’ер-міністр. — Але, абмяркоўваючы ідэю „Біяграда“, трэба, каб гэта быў не проста папулісцкі жэст. Мы глядзім, каб там прысутнічалі канкрэтныя праекты. Гэта пытанні, звязаныя з кансервантамі, з рознымі прэпаратамі для сіласавання зялёных кармоў, з працэсамі браджэння, камбікормавай прамысловасцю. У гэтым плане мы мяркуем, што за біялагічнай навукай, біялагічнай прамысловасцю добрая, вялікая перспектыва».
Як зазначыў кіраўнік урада, у Беларусі ў гэтым кірунку працуюць некалькі навукова-даследчых інстытутаў, у першую чаргу Інстытут мікрабіялогіі НАН, па распрацоўках якога ствараецца дастаткова шмат вытворчасцяў і прадпрыемстваў у рэальным сектары эканомікі.
Прэм’ер-міністр таксама паведаміў, што ў найбліжэйшай будучыні пад Мінскам з’явіцца беларуска-кітайскі індустрыяльны парк. «У нас намячаецца грандыёзны праект, які можа не ўступаць „Сколкава“, а можа, нават недзе больш цікавейшы. Гэта беларуска-кітайскі індустрыяльны парк. Мы зараз завяршылі чарговы тур перамоў. Пляцоўка пад гэты аб’ект ужо вызначана ў раёне Нацыянальнага аэрапорта „Мінск“ плошчай 5,5 тыс. гектараў. У хуткім часе будзем выходзіць на кіраўніка дзяржавы з прапановамі аб характары міжурадавага пагаднення і механізме рэалізацыі гэтага праекта», — сказаў Мясніковіч.
Каментары