Людзі глядзяць на афіцыйна набытую валюту з той жа насцярожанасцю, што і на новыя лаўкі ў метро.
Абменнік «Франсабанка» на вуліцы Казлова (каля крамы «Акіян») дзякуючы фотарэпарцёрам стаў сапраўднай зоркай у часы валютнага крызісу. Шэраг банкаў ужо аб’явіў новы курс валютаў. Тут жа да абеду пакуль пануе нервовае зацішша. Заходжу ў памяшканне, каб зірнуць на табло. З зэдліка ускоквае жанчына, пытае: «Вы здаваць?» Натуральна, няма дурняў здаваць па 5000, калі праз гадзіну-другую можна будзе атрымаць удвая больш.
Але для людзей, што дзяжураць тут не першы дзень і тыдзень, гэтыя некалькі гадзін — ці не апошні шанец зарабіць на дурніцу на выпадковым замежніку.Ці летуценным суайчынніку.
Праз дарогу аддзяленне БПС-Банка. Ён яшчэ не змяніў курс для вольнага продажу. Тут усё строга — няма ні зэдлікаў, ні сцэментаваных чаканнем валюты чэргаў. Пад табло са «старымі» яшчэ курсамі стаіць міліцыянт.
Каля абменніка «Белінвестбанка» на перасячэнні праспекта Незалежнасці і вуліцы Леніна таксама цішыня. Блукаючы ў пошуках іншых банкаў, сустракаю фотарэпарцёра. Той трымае фотаапарат напагатове.
«У «Беларусбанк» не пойдзем, там толькі пасля абеду нешта можа змяніцца. Гэтыя будуць чакаць да апошняга»,— кажа жанчына сваёй сяброўцы, выходзячы з «Аграпрамбанка» на Карла Маркса. Заходжу — курс яшчэ не мянялі.
Удача ўсміхаецца на рагу Камсамольскай і Карла Маркса ў аддзяленні «ДэльтаБанка». Тут табло ўжо свеціцца абноўленым курсам. Каля акенца касы невялікая чарга. Людзі з лёгкім недаверам касавурацца на новыя лічбы. Ад касы адыходзіць мужчына. Ён разглядае грошы і квітанцыю. На твары тая самая насцярожанасць, што і ў некаторых пасажыраў метро пры выглядзе новых лавак.
Цяпер чытаюць
Сёстры Груздзевы драматычна расказалі, як іх выкінуў за дзверы міністр культуры Руслан Чарнецкі. «Як сабак»16
Каментары