Ваенная пракуратура адмовіла ў распачынанні крымінальнай справы па факце заявы Саннікава аб катаваннях у СІЗА КДБ
Беларуская ваенная пракуратура адмовіла РГА «Беларускі Хельсінкскі камітэт» (БХК) у распачынанні крымінальнай справы па факце заявыэкс-кандыдата ў прэзідэнты Андрэя Саннікава аб катаваннях, што прымяняліся да яго ў следчым ізалятары КДБ.
Як паведамляў БелаПАН, праваабаронцы прасілі ваенную пракуратуру правесці праверку заявы Саннікава і распачаць крымінальную справу па прыкметах артыкулаў, якія прадугледжваюць адказнасць за перавышэнне службовых паўнамоцтваў і прымяненне насілля асобамі ў афіцыйным статусе; прыцягнуць да адказнасці вінаватых і паведаміць аб выніках праверкі.
Як вынікае з адказу следчага па важнейшых справах следчага аддзела ваеннай пракуратуры Андрэя Халімава, у распачынанні крымінальнай справы адмоўлена
Што да матэрыялаў праверкі па факце заявы Саннікава, то яны з’яўляюцца сакрэтнымі ў сувязі з наяўнасцю ў іх «звестак, якія складаюць тайну, што ахоўваецца дзейным заканадаўствам «, інфармуе следчы.
Каментуючы сітуацыю, старшыня БХК Алег Гулак заявіў: «Такі адказ нас не можа задаволіць. З яго не бачна, наколькі сур’ёзна ажыццяўлялася праверка, што было ўстаноўлена ў ходзе яе і да якіх высноў прыйшло следства».
Акрамя таго, паводле слоў Гулака, БХК «не задавальняе тое, што, на думку следчага Халімава, матэрыялы праверкі з’яўляюцца сакрэтнымі». «Згодна з беларускім заканадаўствам „не могуць быць абмежаваны доступ да інфармацыі, распаўсюджванне і (або) прадастаўленне інфармацыі: аб правах, свабодах і законных інтарэсах фізічных асоб; аб стане злачыннасці, а таксама аб фактах парушэння законнасці“ (артыкул 16 Закона аб інфармацыі). БХК будзе дабівацца доступу да інфармацыі аб выніках гэтай праверкі», — заявіў кіраўнік праваабарончай арганізацыі.
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку10
Каментары