І забараніла правядзенне ў Мінску канцэрта шведскага гурту Marduk.
Генеральная пракуратура забараніла правядзенне ў Мінску канцэрта шведскага гурту Marduk, які павінен быў адбыцца 22 мая ў клубе Re:Public.
Пра гэта 14 мая журналістам паведаміў начальнік упраўлення Генпракуратуры па наглядзе за выкананнем заканадаўства і законнасцю прававых актаў Павел Радзівонаў.
«Група вызнае сатанізм. Нічога агульнага з творчасцю гэта не мае. Гэта здзек з хрысціянскіх каштоўнасцяў, яны прапаведуюць ідэі смерці, трэцяга рэйха. Творчасць носіць абсалютна дэструктыўны характар. Гэта сатаністы, у любым цывілізаваным грамадстве гэта павінна быць забаронена. Тое, што яны робяць, пераходзіць усякія межы», — сказаў прадстаўнік Генпракуратуры.
Ён нагадаў, што мерапрыемствы, на якіх можа прапагандавацца міжнацыянальная і міжканфесійная варожасць, у Беларусі забаронены.Дырэкцыі клуба Re:Public вынесена афіцыйнае папярэджанне аб недапушчальнасці парушэння заканадаўства. Разам з гуртом Marduk у клубе павінны выступіць яшчэ чатыры замежныя гурты. Іх выступленні не забараняліся, аднак арганізатары папярэджаны аб тым, што ў выпадку парушэння заканадаўства агульны канцэрт можа быць спынены, зазначыў прадстаўнік Генпракуратуры.
Радзівонаў таксама паведаміў, што афіцыйнае папярэджанне аб недапушчальнасці парушэння заканадаўства Генпракуратурай вынесена арганізатарам канцэрта «Групы Ленінград», які павінен адбыцца 18 мая ў адной з самых папулярных забаўляльных устаноў Мінска.У якой канкрэтна, прадстаўнік пракуратуры гаварыць адмовіўся, не жадаючы рабіць ёй рэкламу.
Разам з тым ён звярнуў увагу на тое, што лідар «Ленінграда» Сяргей Шнураў выкарыстоўвае ў тэкстах сваіх песень нецэнзурную лаянку, што не магло не застацца без увагі галоўнага нагляднага органа краіны.
Радзівонаў нагадаў, што нецэнзурная лаянка ў грамадскім месцы кваліфікуецца як хуліганства і да адміністрацыйнай адказнасці могуць быць прыцягнуты як сам выканаўца, гэтак і арганізатары канцэрта.Паводле яго слоў, арганізатары абавязаліся правесці адпаведную гутарку са Шнуравым, «каб не дапусціць мату са сцэны». «Гэта пытанне не толькі выканання заканадаўства, але і маральнага стану нашага грамадства. Нашы дзеянні маюць цывілізаваны забараняльны характар, мы не прэтэндуем на цэнзараў», — сказаў Радзівонаў.
Ён паведаміў, што Генпракуратура звярнула ўвагу камітэта па культуры Мінгарвыканкама на неабходнасць належнага кантролю за такімі канцэртамі, «не замахваючыся на свабоду творчасці».
Каментары