Супрацоўнік мясцовага аддзела КДБ Сілкоў пісьмова папярэдзіў Галіну Смірнову пра недапушчальнасць дзеянняў, якія могуць прывесці яе да крымінальнай адказнасці.
30 жніўня актывістка апазіцыі і член незалежнага прафсаюза радыёэлектроннай прамысловасці Галіна Смірнова была выклікана позвай на гутарку ў мясцовы аддзел КДБ.
Як паведаміла Смірнова, яе папярэдзілі пра недапушчальнасць дзеянняў, што могуць прывесці да парушэння арт. 342 КК (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх).«Сілкоў сказаў, што ў мяне шмат дзеянняў, якія трапляюць пад гэты артыкул, і мяне могуць прыцягнуць паводле гэтага артыкула. Пачаў мне нагадваць маўклівыя акцыі, Народны сход, за які я ўжо адбыла незаконнае пакаранне», — адзначыла Смірнова.
Паводле яе слоў, у гутарцы, што доўжылася дзве з паловай гадзіны, Сілкоў успамінаў нават тыя акцыі ў Бабруйску, у якіх актывістка не ўдзельнічала. «У выніку загадзя падрыхтаваны пратакол перарабляў два разы», — сказала яна.
Смірнова не адказала на многія пытанні, спасылаючыся на арт. 27 Канстытуцыі, згодна з якім ніхто не павінен прымушацца да давання паказанняў і тлумачэнняў супраць самога сябе. «Размаўлялі пра Беларусь.Ён пытаўся, чаго мы хочам. Я тлумачыла: мы хочам, каб нашы дзеці жылі ў свабоднай краіне, каб не баяліся адстойваць свой пункт гледжання, каб улада да іх прыслухоўвалася. Я сказала, што яны саджаюць людзей у турму толькі за тое, што ў гэтых людзей іншае меркаванне», — заявіла Смірнова.
Яна мае намер пракансультавацца з юрыстамі на прадмет абскарджання ў пракуратуры дзеянняў супрацоўніка КДБ. На яе думку, Сілкоў, займаючыся запалохваннем палітычнай актывісткі напярэдадні выбараў, выйшаў за межы сваёй кампетэнцыі, выносячы ёй папярэджанне такога кшталту.
Цяпер чытаюць
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»40
Каментары