Літоўскія СМІ: Бліжэйшае кіраўніцтва Лукашэнкі скупляе нерухомасць у цэнтры Вільні і рыхтуе план адступлення
Бліжэйшы асяродак Лукашэнкі і буйныя алігархі, можна сказаць, жывуць у Вільні. Яны купляюць кватэры і дамы, кантактуюць з палітыкамі і мясцовымі прадпрымальнікамі. І ўжо даўно фармуюць такі погляд на рэжым Лукашэнкі, які ім патрэбны, паведаміў тэлеканал TV3 у перадачы «Каментары тыдня».
У самым сэрцы старой Вільні ў раскошных апартаментах праводзяць выходныя беларускія алігархі. І не проста бавяць час. Як паведамляюць крыніцы, тут купілі кватэры бліжэйшыя паплечнікі Аляксандра Лукашэнкі.
Літоўскія СМІ называюць імёны некаторых бизнэсоўцаў і чыноўнікаў.
Паводле звестак крыніц, беларускія алігархі не губляюць час дарма ў Вільні, а размаўляюць з літоўскімі мільянерамі — Аўгусцінасам і Артурасам Ракаўскасамі, Таўтвідасам Барштысам. Самі літоўскія прадпрымальнікі не выказваюцца на гэтую тэму.
«Я нічога не буду каментаваць. Яшчэ раз паўтараю, прабачце, я ў адпачынку. Ні адмаўляць, ні пацвярджаць нічога не буду», — сказаў Артурас Ракаўскас.
Па словах палітычных аглядальнікаў, сітуацыя двухсэнсоўная: з аднаго боку, Вільня павінна радавацца, што ў Літву паступаюць дадатковыя грошы, але не можна не бачыць і іншы аспект — што, знаходзячыся ў Літве, беларускія алігархі і іншыя высокапастаўленыя службовыя асобы аказваюць выгадны ім ўплыў.
Палітычны аглядальнік Рымвідас Валатка не выключае, што названыя беларусы "выконваюць заданні КДБ - падзейнічаць, паўплываць, потым павярнуць справу так, каб Літва менш крытычна ставілася да Беларусі, не звяртала ўвагі на парушэнні правоў чалавека".«І на самай справе, калі ўспомніць дзіўны выпадак з беларускім ваенным Сцяпанам Захарчанкам, якому Літва не дала палітычны прытулак, можна зрабіць выснову, што гэта, магчыма, і ёсць вынік такіх адносін», - мяркуе аналітык.
Дэпартамент дзяржбяспекі Літвы адмаўляецца каментаваць, ці сочаць яны за набыткамі беларускіх алігархаў і за магчымым уплывам — нібыта гэта не іх сфера. Па словах службовых асоб ДДБ, беларускія чыноўнікі — таксама людзі, і могуць купляць у Літве нерухомасць.
Старшыня камітэта нацыянальнай бяспекі і абароны Арвідас Анушаўскас сцвярджае, што, купляючы нерухомасць у Літве, атачэнне Лукашэнкі, магчыма, рыхтуе плацдарм для адступлення.
«Часцей за ўсё ў аўтарытарных дзяржавах адбываюцца такія працэсы, што бліжэйшае асяроддзе рыхтуе шлях адступлення. Вільня знаходзіцца вельмі блізка ад Мінска», — сказаў Анушаўскас.
Цяпер чытаюць
«Шынвізэ — кончаны садыст». Адзін з адыёзных начальнікаў калоніі Бабруйска перабраўся ў Германію24
Каментары