Пракурор прыслаў адпiску
Нарэшце Беларускi Гуманiтарны Фонд «Наша Нiва» атрымаў доўгачаканы адказ ад Генэральнага пракурора Беларусi сп. А.Бажэлкi. Але нашыя чаканьнi спраўдзiлiся толькi часткова. Па-першае, у вынiку нашай газэце гэтак i не адмянiлi папярэджаньня. А па-другое, гэтак i ня здолелi растлумачыць чаму:
«Ваша заява аб нязгодзе з аб 'яўленьнем галоўнаму рэдактару газэты «Наша Нiва» афiцыяльнага папярэджаньня аб недапушчальнасьцi парушэньня закона ў сувязi з публiкацыяй артыкула «Што яны выраблялi» разгледжана.
Падставаў для яго адмены няма, паколькi ў артыкуле ў якасьцi вываду зроблена атаясамлiваньне ўсiх партызан Вялiкай Айчыннай вайны з бандытамi.
Што датычыцца канкрэтных фактаў учыненых на тэрыторыi Слонiмскага раёну злачынстваў супраць мiрнага насельнiцтва з боку асоб, указаных у артыкуле «Што яны выраблялi», то яны па даручэньню Беларускай ваеннай пракуратуры правяралiся Камiтэтам дзяржаўнай бясьпекi Рэспублiкi Беларусь.»
Што ж мы маем у вынiку? Ускоснае самаабвяржэньне — бо артыкул усё ж быў прысьвечаны менавiта канкрэтным асобам, якiя ўчынялi злачынствы на тэрыторыi канкрэтнага раёну, а ня ўсiм партызанам мiнулае вайны, пра што сп. Бажэлка слушна заўважыў. У «Нашай Нiве» было шмат публiкацыяў пра розных партызанаў —беларускiх, украiнскiх, лiтоўскiх, якiя змагалiся за свабоду сваiх краiнаў, атаясамляць якiх з бандытамi было б i сапраўды блюзьнерствам.
У памянёным нашанiўскiм артыкуле бандытамi названыя некалькi асобаў зь лiку савецкiх партызанаў. Але што ж высьвятлiў КГБ на Слонiмшчыне, дзе яны нiбыта правяралi факты? Напэўна вынiкаў гэтае праверкi нам давядзецца чакаць ня меней, чым «зьмястоўнага» лiста ад пракурора, гаворка ў якiм вядзецца не пра Праўду, а пра «недапушчальнасьць»...
Сяргей Харэўскi
Цяпер чытаюць
Бабарыка пра сябе ў 2020-м: Гэта не наіўнасць. Не думаю, што такога крыважэрнага сцэнара нехта чакаў25
Каментары