Весткі зь Літвы
Вучыце мовы
Наступным ляўрэатам літаратурнай Нобэлеўскай прэміі можа стаць літовец. Два сябры, два паэты, мэксыканец Герарда Бэльтран і амэрыканец Керы Кіс паедуць сёлета пажыць на швэдзкую выспу Готлянд, дзе будуць перакладаць літоўскіх паэтаў Сігітаса Гяду й Карнэліюса Плацяліса. Пераклады на гішпанскую мову будуць пасьля выдадзеныя ў Гішпаніі й Мэксыцы. Керы Кіс, які сам ужо пераехаў жыць у Вільню, перакладае літоўскую паэзію даўно. Ён кажа: «Ніхто з амэрыканскіх паэтаў не атрымаў Нобэлеўскае прэміі. Зараз пры садзеяньні двух студэнтаў-літоўцаў я перакладаю вершы Сігітаса Гяды й лічу іх вартымі гэткай прэміі. Падкрэсьліваю — уся справа ў перакладзе». Вось у чым справа!
Амэрыканскі паэт, цяперашні віленчук, кажа таксама, што «зь літоўскае паэзіі старэйшага пакаленьня лепшы — Карнеліюс Плацяліс...» Спадар Плацяліс быў, дарэчы, першым зь літоўцаў, хто падпісаў ліст у абарону Славаміра Адамовіча, калі той сядзеў у турме. Калі ўся справа ў перакладах, дык можа хай сабе спачатку літоўцы атрымаюць Нобэля, а потым ужо мы... Не пакідайце ж і мовы чужыя!
Пераканалі
Прыяжджаў у Менск напачатку гэтага месяца віцэ-міністар замежных справаў Літвы спадар Ушацкіс. Яго пераконвала лукашэнкаўскае чынавенства на ўсе лады, што ў Беларусі ўсё добра й можна сябраваць і надалей. Маўляў, дэмакратыя. А што да Шарэцкага й апазыцыі, дык гэта ўсё дробязь. Літоўскі міністар сабе і паехаў. Ажно ў Вільні яму паведамілі, што падчас «Маршу Свабоды» была затрыманая літоўская журналістка з тэлеканалу LNK Ірма Янаўскайтэ. Яна спрабавала здымаць беларускіх міліцыянтаў, за што й адседзела ў пастарунку да канца акцыі. І стужкі паадбіралі.
«Спрачацца там ня мае ніякага сэнсу, бо добра ведама: людзей ў Беларусі затрымліваюць на 72 гадзіны і без усялякае прычыны», — распавяла пасьля ўжо дома І.Янаўскайтэ.
Вось і атрымаўся першым вынікам першага візыту літоўскага віцэ-міністра ў Менск — афіцыйны пратэст. Яго днямі атрымаў пасол Беларусі ў Вільні сп. Гаркун. Сам сп. Ушацкас, разводзячы рукамі, нічога не камэнтуе. Літва нарэшце пераканалася...
Ліцьвін
Цяпер чытаюць
Паступова выйшлі на волю арыштаваныя па «Справе кнігароў». Акрамя аднаго7
Каментары