БТ вачыма беларуса
Чыкін – камунізм ці тэлебачаньне?
Кіраўнік Камуністычнай Партыі Беларусі Віктар Чыкін усё яшчэ знаёміцца з абстаноўкай на новым фронце працы — нацыянальным тэлебачаньні. Дагэтуль усе рэдакцыі (акрамя, вядома, АТН) знаходзяцца ў «падвешаным» стане й ня ведаюць дакладна сваёй будучыні. Стала вядома толькі, што ў БТ-шным эфіры могуць зьявіцца менскія навіны ад СТВ, што выходзяць на 8-м канале. Значыць, яшчэ адной расейскамоўнай праграмай на БТ стане больш. Наўрад ці Чыкін зь Зімоўскім запатрабуюць ад СТВ дзеля выхаду на БТ на беларускую мову перайсьці.
Цікава, ці будзе якая рэакцыя Чыкіна на суботні паказ (заплянаваны яшчэ да яго прыходу) гістарычнага фільму Мартына Скарсэзэ «Кундун». Хоць сам Чыкін у кіно разьбіраецца мала, але як жа братняя КПК?! Фільм жа пра барбарскі захоп камуністычным Кітаем незалежнага Тыбету!
Праблема не такая надуманая, як можа здацца. Пад час чэрвеньскага паказу ў Менску тайваньскіх фільмаў кітайская амбасада спачатку патрабавала мерапрыемства забараніць, потым па кінатэатры «Піянэр» усе дні паказу снавалі кітайскія агенты, сочачы, каб на плякатах зь відамі прыроды не было словаў «Кітайская Рэспубліка Тайвань», а таксама, ці не завітае сюды хто з кітайскіх студэнтаў. А тут па тэлебачаньні «сяброўскай краіны», дзе кіраўнікамі — лепшыя ідэалягічныя сябры, дзе куецца дзясятая частка зброі для кітайскай народнай арміі, гэткая антыкітайская дывэрсія! Так што кітайцы гэта наўрад ці спакойна праглынуць.
У нядзелю выйшаў першы блёк праграмаў Міжнароднага Францускага Тэлеканалу ў перакладзе на беларускую. За братоў Люм’ер і мультфільм пра мультфільмы — дзякуй, пра розных жывёлінаў — заўсёды цікава, але, думаю, сьпявачка тая — малавядомая, састарэлая (у сэнсе — не сучасная й не вялікая музыка), і ў папулярнасьці на тэлеэкране пустыннаму кату значна саступае. Хаця, як прыклад францускага шансону — можа быць. C’est la vie, а працяг будзе.
Арцём Лук’яновіч
Цяпер чытаюць
Слесар з Оршы бегаў ад войска на радзіме, каб пасля памерці за Пуціна. Перад адпраўкай на забой для яго закацілі дыскатэку з афрыканцамі1
Слесар з Оршы бегаў ад войска на радзіме, каб пасля памерці за Пуціна. Перад адпраўкай на забой для яго закацілі дыскатэку з афрыканцамі
Пасол Украіны па пытаннях Беларусі адказаў на дыскусію Вячоркі і крытыкаў Ціханоўскай: Ваша ўзаемная непрымальнасць адыгрывае вельмі неканструктыўную ролю4646
Каментары