Думалі — ня ведае (Стан сьледзтва ў справе зьнікненьня Завадзкага)

 Думалі — ня ведае

Стан сьледзтва ў справе зьнікненьня Завадзкага

Сытуацыя з расьсьледаваньнем зьнікненьня Завадзкага становіцца крытычнай, — пра гэта ў інтэрвію БелаПАН заявіў Павал Шарамет. Паводле ягоных зьвестак, сьледчая група, якая займалася расьсьледаваньнем, знаходзіцца на мяжы роспуску. «Сьледчыя КДБ фактычна адхіленыя ад справы. Адхіленыя і сьледчыя МУС», — сказаў Шарамет. Паводле ягоных зьвестак, сьледчая група разьбірала адразу некалькі злачынстваў, ва ўчыненьні якіх падазраюцца былы афіцэр «Алмазу» Валеры Ігнатовіч, баец гэтага ж спэцаддзелу МУС Максім Малік і іншыя асобы: забойствы прадпрымальнікаў у Жодзіне й Барысаве, забойства прадпрымальніка і яго прыёмнай дачкі ў Мар’інай Горцы, забойства азэрбайджанскай сям’і ў Менску, зьбіцьцё кіраўніка кантрольна-рэвізійнага ўпраўленьня Міністэрства культуры Грыгор’ева, забойства кіраўніка беларускага аддзяленьня РНЕ Глеба Самойлава, выкраданьне Завадскага. Усе злачынствы ўчыненыя рознымі людзьмі, але ўсе яны ўваходзілі ў адну злачынную групоўку. Ігнатовіч, паводле словаў Шарамета, «быў адной з ключавых фігураў». Сам Ігнатовіч, які знаходзіцца ў сьледчым ізалятары, сваёй віны не прызнае, адмаўляецца хадзіць на допыты, куды яго дастаўляюць на насілках, выгуквае «Няхай жыве прэзыдэнт Лукашэнка!» і пагражае сьледчым «выразаць» іх сем’і.

Справа па забойствах у Жодзіне й Барысаве ўжо фактычна завершаная і, можа, хутка яе перададуць у суд, «калі яе не замаўчаць», адзначыў Шарамет. Гэтыя злачынствы маглі быць раскрытыя пару месяцаў таму — сьледчыя выходзілі на падазроных, у прыватнасьці, байца «Алмазу» Маліка. Але іх спынялі. Ды і ў саміх сьледчых узьнікалі сумневы: усё ж пад падазрэньнем аказваліся супрацоўнікі элітнага аддзелу МУС.

На стадыі завяршэньня справа з Мар’інай Горкі. Замінка ў тым, што адзін з асноўных сьведкаў — таксама былы баец «Алмазу» — цяпер жыве ў Ізраілі. «Усё залежыць ад пазыцыі цяперашняга генпракурора Шэймана і міністра Навумава», — сказаў Шарамет. У гэтых справах ёсьць сьведкі, што пазналі некаторых забойцаў, рэчавыя і іншыя доказы.

На думку Шарамета, адстаўкі старшыні КДБ Уладзімера Мацкевіча і генэральнага пракурора Алега Бажэлкі адбыліся з-за таго, што сьледчая група атрымала зьвесткі аб дачыненьні некаторых супрацоўнікаў спэцбрыгады хуткага рэагаваньня МУС, якую ўзначальвае Дзьмітры Паўлючэнка, да шэрагу злачынстваў, у тым ліку выкраданьняў Віктара Ганчара і Юр’я Захаранкі. Паўлючэнку затрымалі. У яго дома і на службе ўсё ператрэсьлі. Аднак дзеяньні сьледчых спыніў асабіста сакратар Рады бясьпекі Шэйман. Пасьля гэтага Паўлючэнку выпусьцілі з ізалятару. А Мацкевіч і Бажэлка паляцелі са сваіх пасадаў. «Галоўная ахвяра гэтых перастановак — Мацкевіч і сьледчыя КДБ, — сказаў Шарамет. — Яны былі пэўныя, што Лукашэнка ня ведае пра супрацьпраўныя дзеяньні некаторых супрацоўнікаў спэцбрыгады МУС, якая непасрэдна падпарадкоўвалася сакратару Рады бясьпекі, і разьлічвалі, што яны будуць пакараныя. Выйшла ж наадварот. Лукашэнка выступіў у абарону гэтых людзей».

Паводле БелаПАН