Аднадушнасьць і згуртаванасьць

На правах рэклямы

Аднадушнасьць і згуртаванасьць

Цесна згуртаванымі шэрагамі ідзе беларускі народ насустрач выбарам Прэзыдэнта Рэспублікі Беларусі Аляксандра Рыгоравіча Лукашэнкі

Людзі непадзельна падтрымліваюць унутраную і зьнешнюю палітыку Аляксандра Рыгоравіча Лукашэнкі, накіраваную на ўмацаваньне магутнасьці сувэрэннай Рэспублікі Беларусі ў саюзе з братняй Расеяй, на падвышэньне дабрабыту беларускага народу, на захаваньне і ўмацаваньне міру і стабільнасьці на плянэце.

Падрыхтоўка да выбараў зьяўляецца яскравым сьведчаньнем далейшага разьвіцьця й паглыбленьня дэмакратыі, яшчэ больш шырокага прыцягненьня людзей да кіраваньня справамі дзяржавы й грамадзтва. Аляксандар Рыгоравіч Лукашэнка асабіста вядзе актыўны пошук найбольш эфэктыўных сродкаў ажыцьцяўленьня нарадаўладзьдзя, дабіваецца лепшага выкарыстаньня яго правераных на практыцы формаў. Цэнтар цяжару ў гэтай рабоце пераносіцца на поўную і пасьлядоўную рэалізацыю тых вялікіх правоў, якімі надзеленыя Саветы, працоўныя калектывы, усе зьвёны нашай дэмакратычнай сыстэмы.

Ва ўрачыстай і сьвяточнай абстаноўцы праходзіла пасяджэньне працоўнага калектыву газэты “Наша Ніва”, прысьвечанае завяршэньню падрыхтоўкі да пачатку папярэдняга галасаваньня. Паседжаньне адкрыў вэтэран журналістыкі, інвалід ВАВ Аляксандар Суслаў.

– Кожны вечар мы глядзім па БТ “Панараму”, – сказаў ён, – віртуальна, гэтак кажучы, сустракаемся з нашым прэзыдэнтам. І міжволі задумваемся: чаму ён трывае нахабны паклёп апазыцыі і нават просіць журналістаў дзяржвыданьняў ня ўцягвацца ў перадвыбарную грызьню? З аднаго боку, свабода выказваньня думак замацаваная ў Канстытуцыі, зь іншага – чаму дзяржаўная прэса павінна займаць інэртную пазыцыю і даваць яўную фору падманшчыкам?..

Калі мала каму вядомы дырэктар саўгасу высунуў сябе ў прэзыдэнты, мы сумняваліся: а ці пацягне? Але мне згадвалася даўняе прароцтва дырэктара Магілёўскага гархарчгандлю (дзе ў той час зусім яшчэ юны Лукашэнка працаваў сакратаром камсамольскай арганізацыі), які сьцьвярджаў, што “гэты чалавек (г.зн. Лукашэнка) далёка пойдзе”...

Народ бачыць, што караўнік дзяржавы асабіста сам клапоціцца, каб заробак выплочваўся своечасова, каб ён павялічваўся, нягледзячы на цяжкасьці з інфляцыяй. Людзям імпануе, што Прэзыдэнт трымае курс на сяброўства з Расеяй. Яны вераць, што толькі ў адзінстве з братамі-славянамі мы можам вылезьці з той ямы, у якую нас сьпіхнулі Белавескія пагадненьні.

Гэтыя словы прысутныя сустрэлі бурнымі працяглымі аплядысмэнтамі. Беларускі народ ведае Аляксандра Рыгоравіча Лукашэнку як ініцыятара расейска-беларускай інтэграцыі, нястомнага прапагандыста ідэяў славянскага адзінства, кіраўніка сапегаўска-машэраўскага тыпу, нястомнага барацьбіта за бясьпеку на тэрыторыі Цэнтральнай Эўропы й рэспублік былога Савецкага Саюзу.

Для кожнага з нас плённая нястомная праца Аляксандра Рыгоравіча Лукашэнкі на пасадзе Прэзыдэнта – яркі ўзор самаадданага выкананьня абавязку перад выбарцамі, апоры на масы пры вырашэньні складаных эканамічных, сацыяльных і выхаваўчых задач на шляху да дасягненьня паказчыкаў 1990 году.

Справаздача складзеная з артыкулаў “Аднадушнасьць і згуртаванасьць” (“Звязда”, 25 студзеня 1985 г. №17) і “...Жуки и жабы не заменят льва” (“Рэспубліка”, 22 жніўня 2001 г., №193).