Афіцыйны візіт Аляксандра Лукашэнкі ў Пакістан пераносіцца на два дні з прычыны смерці яго маці Кацярыны Трафімаўны.
Пра гэта сёння на тэлеканале «Беларусь-1» заявіла прэс-сакратар кіраўніка дзяржавы Наталля Эйсмант, паведамляе БЕЛТА.
«Візіт кіраўніка дзяржавы ў Пакістан пераносіцца. Як плануецца, ён адбудзецца 28—29 мая.
Прычынай пераносу стала смерць маці Аляксандра Лукашэнкі», — заявіла прэс-сакратар.
«Што тычыцца візіту, то яго фармат застаецца нязменным. Візіт Аляксандра Лукашэнкі ў Пакістан стане заключным этапам праведзенай вялікай працы», — адзначыла Наталля Эйсмант.
«Мы ведаем, што прэзідэнта Беларусі ў Пакістане вельмі чакаюць, і мы ўдзячныя прымаючаму боку за разуменне і магчымасць перанесці намечаныя перамовы на больш позні тэрмін», — дадала прэс-сакратар.
Афіцыйны візіт кіраўніка беларускай дзяржавы ў Пакістан меў прайсці 26—27 мая.
У жніўні 2013 г. Tut.by наведаў Александрыю — радзіму А. Лукашэнкі і пагутарыў з Зінаідай Рыбаковай — блізкай сяброўкай Кацярыны Трафімаўны:
«Яна [Кацярына Трафімаўна] хворая — распавяла жанчына. — Летась ён прывозіў яе. Ахоўнікі па мяне тройчы прыязджалі, каб да яе адвезці. А я сама хварэла, на трэці раз толькі паехала. Ну, пасядзелі з ёй, паплакалі за сваё. У хаце ў яе. Яна мне кажа: хто зайздросціць майму жыццю, каб ёй такое. Я не хачу нічога, я хачу ў вёску», — казала Трафімаўна.
Сп. Рыбакова дадала, што Кацярына Трафімаўна аднойчы клікала яе ў госці ў Мінск: «Прыязджай, казала, да мяне — пабудзь, колькі хочаш. А я кажу: ты ж, Трафімаўна, да мяне прыязджай, будзем на печы б сядзець, бульбу варыць і есці…».
Каментары