Польская кухня ў малюнках, біяграфія Гадлеўскага, раманы Рублеўскай і Анкі Упалы, аўтограф-сесіі аўтараў — на Міжнароднай кніжнай выставе
У выдавецтве «Янушкевіч» пабачылі свет новыя выданні — яны прадстаўленыя на Мінскай міжнароднай кніжнай выставе.
Анка Упала. На заснежаны востраў. Раман
Сённяшні свет — маленькі і крохкі. Тое, што адбываецца на іншым кантыненце, адбываецца на адлегласці выцягнутай рукі, адбываецца з табой. Мы ўсе жывём разам, дыхаем адным паветрам, п’ём адну ваду. Ніхто не чужы, ніхто не іншы настолькі, каб быць бясконца далёкім. У пэўным сэнсе іншасць — гэта ілюзія.
У сваёй аўтабіяграфічнай кнізе Анка Упала апісвае рэальных людзей і рэальныя падзеі. Змененыя толькі імёны і некаторыя тапонімы. «Я не магла дазволіць сабе бавіцца выдумкай, бо знаходжу гэтую гісторыю занадта важнай, большай за мяне, большай за нас, — кажа пісьменніца. — Хай тыя, хто пажадае, пражывуць яе разам са мной».
Падзеі рамана адбываюцца ў Яблычным горадзе, куды пісьменніца выправілася, каб падвучыць шведскую мову. А разам з ёй там аказаліся дзясяткі іншых такіх самых шкаляроў з розных краін.
Аўтограф-сесія аўтара пройдзе падчас мінскага кніжнага кірмашу на стэндзе выдавецтва ў пятніцу, 2 сакавіка, а 14.00 (будынак БелЭКСПа, пр-т Пераможцаў, 14).
Анна Златковская. Страшно жить, мама. Аповесць
Што для вас адзінота? Вядомае многім пачуццё, апісанае шматлікімі пісьменнікамі. Але кожны аўтар раскрывае яго па-свойму. Ганна Златкоўская гэта робіць на прыкладзе маленькай дзяўчынкі. Народжаная па-за шлюбам, Ліка становіцца нежаданай для маці: тая чакала хлопчыка. У жанчын жа, па яе перакананнях, нешчаслівае жыццё апрыёры. І з гэтым настаўленнем дзяўчынцы даводзіцца ісці па жыцці.
«Гэтая аповесць пра жаночую душу, пра страхі і сумневы, пра адзіноту. Ва ўсім гэтым нам, жанчынам, дзяўчатам, дзяўчынкам, страшна прызнацца. Мы хаваем ад людзей свой унутраны свет, стараемся падладзіцца пад тых, каму прасцей жывецца, як нам здаецца.
Таму я напісала кнігу, каб расказаць яшчэ адну маленькую, але важную гісторыю пра дзвюх жанчын, якія моцна жадаюць быць любімымі. Толькі яны не ведаюць, дзе знайсці любоў і каханне», — тлумачыць Ганна.
Кніга «Страшна жыць, мама» — дэбютная для аўтара. Але яна ўжо атрымала станоўчыя водгукі. Напрыклад, пісьменнік Віктар Марціновіч параўнаў аповесць з кнігай «Пахавайце мяне за плінтусам» расійскага аўтара Паўла Санаева і раманам паляка Януша Вішнеўскага «Адзінота ў сеціве». Настолькі ўдала Златкоўская здолела перадаць адзіноту маленькай дзяўчынкі. Але гэта зусім не дзіцячая кніга. І не аўтабіяграфічная — сюжэт цалкам прыдуманы. Хоць менавіта такім можа быць жыццё ў многіх дзяўчынак па ўсім свеце.
Аўтограф-сесія аўтара пройдзе падчас мінскага кніжнага кірмашу на стэндзе выдавецтва ў суботу, 3 сакавіка, а 12.00 (будынак БелЭКСПа, пр-т Пераможцаў, 14).
Яанна Фургаліньска. Польская кухня. Адчуй смак традыцый: Зірні. Згатуй. З’еш / пераклад з польскай Вольгі Гуд
Гэтая кніга змяшчае найбольш папулярныя рэцэпты польскай традыцыйнай кухні. Яны пададзены арыгінальным спосабам — у выглядзе малюнкаў і тлумачэнняў да іх. Дзякуючы гэтаму, атрымаўся наглядны дапаможнік, па якім кожны зможа з лёгкасцю згатаваць смачныя стравы і тым самым дакрануцца да глыбокіх і блізкіх кулінарных традыцый Польшчы (не далёкіх і для беларусаў).
«У вулічнай апытанцы, праведзенай у адным з польскіх гарадоў, у адказ на пытанне пра тыповыя польскія стравы маладыя людзі найчасцей называлі піцу, бульбу фры, кебаб і спагеці. Падобнае ўражанне можа скласціся ў замежных турыстаў, якія беспаспяхова шукаюць у польскай правінцыі рэстаран з традыцыйнымі стравамі. Відаць, у пагоні за кулінарнай модай мы забыліся на нашу шматвяковую традыцыю», — тлумачыць ідэю кнігі Яанна Фургаліньска. Яна, дарэчы, і зрабіла ўсе малюнкі.
Прэзентацыя незвычайнай кнігі адбудзецца падчас мінскага кніжнага кірмашу 4 сакавіка а 12.00 на стэндзе выдавецтва (будынак БелЭКСПа, пр-т Пераможцаў, 14).
Да выхаду кнігі Інстытут Польскі і выдавецтва таксама абвясцілі фотаконкурс. Умовы простыя: трэба згатаваць любую страву па рэцэпце з «Польскай кухні», зрабіць фота і размясціць яго ў сацыяльных сетках (Фэйсбук, Укантакце, Інстаграм) з хаштэгам #ПакаштуйПольшчу. На фотаздымку абавязкова павінна быць прыгатаваная Вамі страва і кніга «Польская кухня», а ўсё астатняе — Ваша фантазія.
Фотаздымкі на конкурс прымаюцца да 4 красавіка, а вынікі будуць абвешчаны 5 красавіка 2018 года. Пераможцы атрымаюць каштоўныя прызы ад арганізатараў.
Людміла Рублеўская. Пантофля Мнемазіны. Раман
У сваім новым рамане Людміла Рублеўская ператасоўвае віртуальную рэальнасць і гістарычныя падзеі і ставіць герояў перад выбарам: змірыцца, стаць часткай сістэмы альбо ўпарта абараняць выспу ўнутранай свабоды.
Маладая дызайнерка Вірынея праштрафілася перад начальствам і адпраўлена працаваць у маленькую транспартную газетку. На станцыі метро яна выпадкова заўважае ўласнага мужа, які нібыта загінуў сем год таму. Але дэтэктыўная інтрыга — толькі фон, на якім даследуецца цэлая эпоха. Рэпрэсіі 1930-х гадоў, ганебная «справа дактароў», карная медыцына, спецбальніца, схаваная ў пушчы, якая робіцца прытулкам для «ворагаў народа»… І немагчымая гісторыя кахання, якая адбываецца ў сталінскіх засценках, у лагерах ГУЛАГа, у хрушчоўскую «адлігу» і нават у XXI стагоддзі.
Дзе заканчваецца віртуальная рэальнасць, удзельнікам якой чытач раптам становіцца, ён не зразумее да апошняй кропкі.
Летась кніга Рублеўскай «Авантуры Пранціша Вырвіча, здрадніка і канфедэрата» была ўганаравана Нацыянальнай літаратурнай прэміяй, а раман «Дагератып» атрымаў другое месца літаратурнай Прэміі імя Ежы Гедройца. Новы твор абяцае стаць не менш паспяховым.
Аўтограф-сесія аўтара пройдзе падчас мінскага кніжнага кірмашу на стэндзе выдавецтва ў суботу, 3 сакавіка, а 16.00 (будынак БелЭКСПа, пр-т Пераможцаў, 14).
Вінцэсь Мудроў. Помнік літары «Ў». Навелы і апавяданні
У новую кнігу сучаснага беларускага празаіка Вінцэся Мудрова ўвайшлі навелы і апавяданні, напісаныя цягам апошніх дзесяці гадоў. Сярод іх выдзяляецца навела «Албанскае танга», якая распавядае пра абставіны разрыву савецка-албанскіх адносін паўстагоддзя назад. У творы выразна прасочваюцца дзве сюжэтныя лініі — непасрэдны канфлікт паміж Мікітам Хрушчовым і Энверам Ходжа, а таксама гісторыя кахання беларускай дзяўчыны і албанскага студэнта.
А ў апавяданні «Помнік літары «Ў»» Мудроў да камічнага даводзіць «змаганне» з мовай на мясцовым узроўні.
Пад адну вокладку аўтар сабраў 13 твораў.
Андрэй Вашкевіч. Вінцэнт Гадлеўскі: насуперак часу
Гэтым выданнем адкрываецца серыя навукова-папулярных біяграфій «Беларускія жыццяпісы».
Кніга гарадзенскага гісторыка Андрэя Вашкевіча — першая падрабязная біяграфія святара і грамадскага дзеяча Вінцэнта Гадлеўскага (1888-1942). Аднаго з лідараў Беларускай хрысціянскай дэмакратыі — самай уплывовай незалежніцкай арганізацыі Заходняй Беларусі.
У міжваенны час ён таксама ўзначальваў Беларускі інстытут гаспадаркі і культуры. У Савецкай Беларусі імя святара згадвалася амаль выключна ў прапагандысцкіх брашурах. Прычынай таму — яго супрацоўніцтва з акупацыйнымі нямецкімі ўладамі. Гадлеўскі ўваходзіў у Раду Беларускай народнай самапомачы. Быў прызначаны галоўным школьным інспектарам пры генеральным камісарыяце. Але на кожным месцы для яго на першым месцы была беларуская справа. Таму і загінуў ад рук нацыстаў у Трасцянецкім лесе пад Мінскам. Андрэй Вашкевіч разглядае сем версій гэтага забойства.
І сёння Вінцэнт Гадлеўскі застаецца аб’ектам ідэалагічнай палемікі. Для адных ён — «рыцар незалежнасці», для іншых — «перакананы германафіл». Афіцыйная беларуская гістарыяграфія па-ранейшаму мае негалоснае табу на тэмы, якія нейкім чынам не ўпісваюцца ў сучасны ідэалагічны канон», — тлумачыць аўтар кнігі.
Аўтограф-сесія аўтара пройдзе падчас мінскага кніжнага кірмашу на стэндзе выдавецтва ў нядзелю, 4 сакавіка, а 13.00 (будынак БелЭКСПа, пр-т Пераможцаў, 14).
Аляксандр Гужалоўскі. Чырвоны аловак. Нарысы па гісторыі цэнзуры ў БССР. Кніга 2. 1943-1991 гг.
Савецкая татальная цэнзурная машына кантралявала змест і працэсы распаўсюджвання інфармацыі, у тым ліку друкаваную прадукцыю, музычныя і сцэнічныя творы, творы выяўленчага мастацтва, радыё і тэлебачанне, а таксама кіна-, фота-, фона- прадукцыю з мэтай спынення шкоднай альбо непажаданай інфармацыі.
Чырвоны аловак цэнзуры стаў сімвалам ідэалагічнага бар’ера для думак і ідэй. Чым больш новыя і арыгінальныя яны былі, тым менш было ў іх шансаў дайсці да людзей.
З цэнзарамі давялося пазнаёміцца ўсім грамадзянам, хто пісаў, здымаў, маляваў, ажыццяўляў пастаноўкі, макетаваў палосы і ствараў экспазіцыі, заўсёды знаходзіліся ў полі зроку цэнзараў.
Пра феномен цэнзурнага мыслення красамоўна сведчыць выпадак з інкруставаным партрэтам Сталіна, вырабленым да яго сямідзесяцігоддзя ў 1948 г. беларускімі майстрамі. Зроблены да яго надпіс «Вялікаму Сталіну ад беларускага народа» прыйшлося тэрмінова перакласці на рускую мову, бо нехта ў апошнюю хвіліну прачытаў яго з націскам на прыназоўнік «ад», пераўтварыўшы яго такім чынам у назоўнік.
Аўтограф-сесія аўтара пройдзе падчас мінскага кніжнага кірмашу на стэндзе выдавецтва ў суботу, 3 сакавіка, а 14.00 (будынак БелЭКСПа, пр-т Пераможцаў, 14).
Акрамя гэтага, на стэндзе выдавецтва «Янушкевіч» пройдуць наступныя аўтограф-сесіі:
Пятніца, 2 сакавіка, а 16.00 свае кнігі будуць падпісваць гісторыкі Уладзімір Падалінскі («Прадстаўніцтва ВКЛ на Люблінскім сойме»), Анатоль Трафімчык («Наш Касцюшка слаўны!» і «1939 год і Беларусь»), Мікола Волкаў («Артылерыя Нясвіжскага замка»), Аляксей Шаланда («Таямнічы свет беларускіх гербаў»).
Пятніца, 2 сакавіка, а 17.00 Алесь Белы (Кухмістр Верашчака) падпісвае кнігу «Сакатала бочачка. Праўдзівая гісторыя нашых напояў».
Субота, 3 сакавіка, а 17.00 Альгерд Бахарэвіч падпіша свае кнігі «Сабакі Эўропы» і «Бэзавы і чорны».
Каментары