Гэтымі днямі ўрады адразу некалькіх краін Еўразвязу выказалі гатоўнасць у выпадку чаго прымаць бежанцаў з Украіны і забяспечваць ім належныя ўмовы. Сваю думку адносна гэтага пытання выказалі высокія чыноўнікі Латвіі, Польшчы і Літвы.
Улады Латвіі рыхтуюць умовы да магчымага прыняцця ўцекачоў з Украіны. Пра гэта заявіла міністарка ўнутраных спраў Латвіі Марыя Голубева, піша rus.lsm.lv. Яна падкрэсліла, што цяпер не варта зацыклівацца на колькасці людзей, якую Латвія можа прыняць. Аднак палітык лічыць, што павінна быць зразумела, дзе і як размясціць да 10 тысяч чалавек.
«У Латвіі ёсць план на выпадак, калі ў нашу краіну пойдзе вялікі наплыў уцекачоў. Гэты план існуе некаторы час, але цяпер важна разумець, што ва Украіне ёсць канкрэтныя абставіны. Па-першае, у яе ёсць бязвізавы рэжым з Еўрапейскім саюзам. Па-другое, наш народ справядліва падтрымлівае імкненне Украіны да ўмацавання незалежнасці і тэрытарыяльнай цэласнасці сваёй краіны. Гэта азначае, што будзе разумець неабходнасць прыняць частку ўкраінскіх уцекачоў, калі, крый Божа, пачнецца вайна».
Таксама рыхтуюцца да магчымага наплыву бежанцаў з Украіны і ўлады польскіх рэгіёнаў. Пра гэта напісаў у Твітары міністр унутраных спраў і адміністрацыі Польшчы Марыюш Каміньскі:
«Відавочна, што ў сувязі з сітуацыяй ва Украіне мы рыхтуемся да розных сцэнарыяў. Адзін з іх — дзеянні ваяводаў, звязаныя з магчымым наплывам бежанцаў з Украіны, якія з-за магчымага канфлікту могуць шукаць прытулку ў нашай краіне».
Таксама ўчора пра патэнцыйную гатоўнасць прымаць уцекачоў заявіла літоўская прэм'ерка Інгрыда Шыманіце, якая была з візітам ва Украіне:
«Мы не разглядаем уварванне Расійскай Федэрацыі ва Украіну як цэнтральны сцэнарый, таму што мы ўсё яшчэ спадзяемся, што ў гэтай сітуацыі возьмуць верх дыпламатычнае развязанне і здаровы сэнс. Але ўрад будзе вітаць людзей, якія ратуюцца ад вайны».
«Я падняў аднаго са слабавікоў — і выпусціў яго на асфальт». Дэсантнік Руслан Акостка расказаў, як адседзеў 4 гады13
Каментары