Беларусы паказалі ў тыктоку, як збіраюць на агародзе ўраджай арахісу
Жыхары Столінскага раёна выклалі ў тыктоку відэа, на якім паказалі свой першы ўраджай арахісу, вырашчаны на ўласным агародзе, заўважыў Telegraf.news. Высветлілася, што земляны арэх цалкам прыдатны для вырошчвання ва ўмовах пацяплелага ў апошнія гады беларускага клімату.
Гаспадары агарода паказалі, як выкопваюць саспелы арахіс, папярэдне падкапаўшы кусты, падобна да таго, як гэта робяць з морквай ці бульбай, каб «нічога не засталося ў зямлі». Пасля гэтага дастаткова проста пацягнуць куст уверх — і на паверхні з'яўляецца важкая порцыя земляных бабоў.
Для многіх гледачоў стала нечаканасцю тое, што арахіс расце ў зямлі, бо некаторыя лічылі, што, як і большасць арэхаў, ён павінен расці на дрэвах.
Але насамрэч арахіс ніякі не арэх — гэта сельскагаспадарчая культура з сямейства бабовых.
Мяркуючы па сотнях каментароў, ідэя вырошчваць арахіс на ўласным агародзе зацікавіла многіх. Аўтарам задавалі шмат практычных пытанняў: дзе купіць насенне, калі і як садзіць, як даглядаць расліну.
Па словах аўтараў відэа, насеннем з імі падзялілася знаёмая, якая вырошчвае арахіс у Беларусі не першы год, а сама культура аказалася непатрабавальнай у доглядзе.
«Проста трэба часцей яго абганяць», — растлумачыў мужчына, выкопваючы чарговы куст арахісу.
У каментарыях людзі ахвотна дзяліліся ўласным досведам, адзначаючы, што можна вырасціць арахіс нават з таго, які прадаецца ў крамах на вагу, галоўнае — выбіраць не пражаныя бабы.
Некаторыя паставілі пад сумнеў выгаднасць гэтай задумы. Аднак на прамое пытанне аднаго з гледачоў «А ці выгадна гэта?», аўтары відэа адказалі, што не заўсёды трэба шукаць выгаду ва ўсім, бо «часам цікавасць пераважае».
Радзімай арахісу з'яўляецца Паўднёвая Амерыка, таму большасць яго разнавіднасцяў растуць у гарачым клімаце. Аднак ужо вывелі сарты, адаптаваныя да ўмераных шырот, і ў беларускім клімаце гэтая расліна адчувае сябе выдатна. Для адаптаваных сартоў дастаткова тэмпературы ў 20-25°C.
«Раз — і заходзіш чыстым». Мінчукі паказалі самаробную прыладу, якая дапамагае пазбавіцца ад бруду перад уваходам у пад'езд
Навукоўцы з Акадэміі навук заклікалі беларусаў ісці проста да іх, калі недзе вывудзяць адну рыбіну
Беларуска знайшла ў лесе рэдкі «грыб-васілёк». Што за ён?
Беларускі блогер у самы сквар паспрабаваў пасмажыць яйкі проста на асфальце. Ці атрымалася?
Цяпер чытаюць
Сям’ю з Мінска будуць судзіць за здраду дзяржаве і кантрабанду зброі. Іх, падобна, затрымалі на мяжы — вось што вядома5
Каментары