Ažyjataž na aŭtarynku

Ci praŭda, što ceny na lehkaviki rezka padskočać paśla 1 lipienia? Jakaja dynamika cenaŭ na patrymanyja aŭtamabili isnuje?

Repartaž Alesia Kudryckaha z aŭtarynku.

Haspadar zialonaha «Roveru» sałodka śpić na piarednim siadzieńni, padkłaŭšy ruki pad hałavu. «Maje hady — majo bahaćcie…» — lijecca prytarna-saładžavy śpieŭ z dynamikaŭ. Tut, na aŭtarynku ŭ Malinaŭcy — radoviščy starych patrymanych lehkavikoŭ, — hetyja radki hučać jak ździek. Hety adnosna małady snob-«Rover» vypusku 1998 h. jašče moža dazvolić sabie raskošu kaštavać 6 tys. dalaraŭ, ale z kožnym miesiacam jahonaja cana imkliva mienieje, bo zavod «Rover» na miažy zakryćcia. Ale heta adziny vyniatak na rynku.

Šašłyk na rynku ŭ Malinaŭcy kaštuje 3 450 rub. Stolki ž u siarednim tut prosiać za «Opel Astru» 1994 hodu vypusku — viadoma, nie rubloŭ, a dalaraŭ. Taho, chto čakaje ŭbačyć tut barachołku starych tannych mašyn, čakaje žorstkaje rasčaravańnie. «Čatyry tysiačy čatyrysta…» — sa stohnam vyciskaje ź siabie chudarlavy maładzion i idzie dalej šukać niedarahoje ščaście na čatyroch kołach.

Znajści ŭ Malinaŭcy aŭto canoj da dźviuch z pałovaj tysiač dalaraŭ amal niemahčyma — traplajucca tolki adzinkavyja ekzemplary, takija, jak hety bieły «Folksvahien Džeta» 1989 h. za 1650 dalaraŭ, čyścieńka vymyty, ale farbavany-pierafarbavany, dyj salon, zdajecca, voś-voś pačnie sypacca na častki. Pad kapot zazirać niejak navat nia chočacca…

Mašyny — nia draniki, pa dziesiać štuk za hadzinu nie pradasi. Pakul pakupnikoŭ niama, handlary zabaŭlajucca, jak mohuć — traviać anekdoty, śniedajuć, hulajuć u karty, karystajučysia zamiest stała adčynienym bahažnikam lehkavika-ŭniversała. «Abjavu pra aŭtamabil raźmiaścić nie žadajecie?» — chodziać siarod šerahaŭ lehkavikoŭ kurjery specyjalizavanych vydańniaŭ, prapanujučy pradaŭcam zapoŭnić blanki. Adzin z pradaŭcoŭ nabyvaje ŭ babulki siemki, ź ciažkaściu znachodziačy drobnyja «zajčyki» ŭ stosie dalaraŭ, vyciahnutych z kišeni.

Tavar prezentavany najlepšym čynam. Na aŭtamabilach — ni pylinki. Myćcio kuzava dy pracirańnie faraŭ — najbolš pašyrany zaniatak na rynku. Nalepki ź niamieckimi nazvami dy litaraj «D» pryncypova nie zdymajuć. «Adzin haspadar, tolki što ź Niamieččyny, haražnaje zachoŭvańnie», — ništo tak nia łaščyć vucha patencyjnaha pakupnika, jak takaja charaktarystyka.

Ale pryhladacca treba ŭvažliva. «U vas zapčastki padajuć!» — kaža kabieta ŭ akularach haspadaru jomistaha siamiejnaha ŭniversała «Micubisi Spejsvahan» (1991 h., $6500). «Ni fiha sabie!» — źbiantežana padymaje pradaviec ź ziamli kavałak abšyŭki. «A ŭ kredyt pradaście?» — vykarystoŭvaje zručny momant kabietka, dumajučy, mabyć, źbić canu. «A kali hrošy buduć?» — «Praz paŭhodu vypłacim». «Nie, nia pojdzie», — admachvajecca pradaviec. «Nu j niachaj staić, za paŭhodu ŭsia razvalicca», — kidaje kabieta dy kročyć dalej.

Pa niekatorych handlovych radach idzieš, jak pa aŭtasalonie. Voś «Mazda-6», na vyhlad zusim novaja. 18 tysiač. «Musi-pusi, mileńki moj…» — murłykaje śpiavačka z mahnitoły spartovaha žoŭtaha «Pežo». 9 450 dalaraŭ. «Harantyju daju, anivodnaha skołu», — kaža haspadar vializnaha srebnaha «Mersedesa», na jakim navat nie paznačana cana. Kidajecca ŭ vočy pryhožy «Nisan» z šyldaj «2000» na łabaviku. Niaŭžo taki tanny? Ale heta chitryk, kab pryciahnuć uvahu, — kala ličby maleńkimi litarami napisana «sm³». Heta abjom ruchavika, a cana — u dva z pałovaj razy bolšaja.

Sproba adšukać tanny «narodny aŭtamabil» pravalvajecca — u hety dzień niama anivodnaha «Folksvahiena Holfa» druhoj madeli, spres bolš novaja i darahaja treciaja madel. «Zirnuć žadaješ? — padbiahaje małady chłopiec u biełaj kurtcy da takoha ž biełaha «Holfa-3». — Vielmi dobraja mašyna, — havoryć pradaviec, jaki pradstaŭlajecca Barysam. — Vo, hladzi jakaja akuratnaja. Jaje maja siastra vadziła, joj na zamovu ź Niamieččyny pryhnali». Chto jaho viedaje, moža, i praŭdu kaža: karobka pieradač aŭtamatyčnaja, žančyny takija lubiać. «Voś i servisnaja knižka jość, z usimi adznakami. Dzie tut na rynku jašče takoje ŭbačyš?» Cana — 3 700 dalaraŭ. Jak paraŭnać z astatnimi «Halfami», dyk i niadoraha. «A skinuć krychu možna?» «Za 3 450 addam, — kaža Barys. — Tolki doŭha nie chadzi, bo ŭ mianie pakupnik na prymiecie jość. Tydni dva — i fjuić…» «A praŭda, što buduć na lehkaviki myty padymać?» «Praŭda, praŭda», — achvotna kivaje hałavoj pradaviec. «I nakolki padaražejuć?» — «Mašyny nakštałt hetaj — dalaraŭ na 300—400 u siarednim».

Infarmacyju pra plany adnosna pavyšeńnia pošlin na ŭvoz lehkavikoŭ z-za miažy fizyčnymi asobami ŭžo paćvierdziŭ Dziaržaŭny mytny kamitet, praŭda, pra peŭnyja terminy dy dakładnyja pamiery novych mytnych stavak aficyjnych źviestak jašče nie było. Pavodle nieaficyjnych źviestak, heta adbudziecca ŭletku, chutčej za ŭsio, 1 lipienia. I toje, što adnačasova abiacajuć na 5—15% źmienšyć myty na ŭvoz aŭtamabilaŭ dla jurydyčnych asob, mała suciašaje: viery ŭ toje, što ŭ aŭtasalonach lehkaviki buduć kaštavać tańniej, čym u pryvatnikaŭ, vielmi mała.

Tamu, chto ŭsio-taki vyrašyć nie aščadžać hrošy jašče hod-druhi, a nabyć tannaje aŭto, pakul nie padskočyli ceny, varta lišni raz zazirnuć na rynak aŭtazapčastak: častyja vizyty ŭ hety muzej aŭtadetalaŭ vam harantavanyja.

Nie paškodzić nabyć i hazetu z aŭtaabjavami. Na staroncy kalarovych fota adrazu sustrakaješ vyjavy «starych siabroŭ» z Malinaŭki. Voś jon, bieła-čorny «Smart» za 6 250 dalaraŭ (možna tarhavacca) dy spartovy kabryjalet «BMV», na jakim navat cana nie staić.

U cełym u hazecie značna bolš mahčymaściaŭ adšukać niešta ŭ miežach dźviuch z pałovaj tysiač u.a., dyj toje za košt bolšaha abjomu prapanoŭ. Tym bolš što, uličvajučy ŭzrost tych lehkavikoŭ (12—15 hod), nabyvać ich — sabie daražej. A cenavaja katehoryja ŭ try z pałovaj — piać tysiač dalaraŭ i ŭ hazecie viadzie rej, jak i na aŭtarynku.

Z Malinaŭki adjaždžaješ z pachisnutymi ŭjaŭleńniami pra ŭłasnuju zamožnaść dy ź nievynosnaj spakusaj nabyć nie lehkavik, a čyrvony skuter koštam dva z pałovaj miljony rubloŭ, jaki prezentujuć la vychadu z rynku. Ale nie dla našaha klimatu taki vid transpartu.

Na łužajcy la kalcavoj darohi paśvicca koń. Voś heta transpart — paliva całkam ekalahičnaje dy niedarahoje, pravoŭ nia treba, ni razmytnieńnia tabie, ni eŭra za kubičnyja santymetry. Chiba što z parkoŭkaj u horadzie moža być prablema…

Mytnyja staŭki na aŭtamabili dla pryvatnych asob

Ciapierašniaja systema

Uzrost aŭtamabila (hady) Staŭka za 1 sm3 rabočaha abjomu ruchavika (eŭra)

da 3 hod uklučna 0,6

bolš za 3, ale nia bolš za 10 (abjom ruchavika da 2 500 sm3) 0,35

bolš za 3, ale nia bolš za 10 (abjom ruchavika 2 500 sm3 i bolš) 0,6

bolš za 10, ale nia bolš za 14 0,6

14 i bolš 2

Systema, jakaja moža być uviedziena z 1 lipienia

Uzrost aŭtamabila (hady) Staŭka (eŭra) za 1 sm3 rabočaha abjomu ruchavika

da 3 uklučna 0,75

bolš za 3, ale nia bolš za 7 0,4

bolš za 7, ale nia bolš za 10 ad 0,4 da 0,6 (u zaležnaści ad abjomu ruchavika)

bolš za 10, ale nia bolš za 14 1

bolš za 14 2

Pavodle źviestak hazety «Avtobiźnies-weekly»

• 0
• 0
• 0
• 0
• 0
• 0
• 0
• 0