Što chvaluje biełarusaŭ pry kancy leta? Zamiežnik, pahladzieŭšy biełaruskuju televiziju, pačytaŭšy hazety, jakija robiacca padobnymi adna da adnoj — ad «SB» da rajonki, — adkaža: žnivo. I pamylicca…
Biełarus užo z časoŭ SSSR nie zvažaje na ŭsie ličby narychtoŭki, pieramožcaŭ roznych spabornictvaŭ, kambajneraŭ-tysiačnikaŭ, dajarak-milijanerak — hetaja infarmacyja šyrokaju płyńniu prachodzić skroź jahony rozum, dy biaz škody spłyvaje dalej.
Šarahovy biełarus u hety čas rychtujecca da inšych narychtovak. Źbirajecca ŭ les u hryby. Sotni mašynaŭ štodnia vyjaždžajuć za horad. Ščaśliŭcy, jakija majuć svajakoŭ u vioskach, kirujucca tudy ź piatnicy, kab vypić za viačeraj, a rankam paciahnucca z košykam da bližejšaj puščy. Niebaraki, što nia majuć mahčymaści vyrvacca z pracy, jeduć u hryby ŭviečary, kab za paru hadzinaŭ narezać choć pa viedziarcy. U kaho niama svajho aŭto, uciskvajucca ŭ rajonnyja aŭtobusy.
Nacyja snoŭdaje pa lesie, pilna vyhladajučy śvinki j lisički. Pad Baranavičami narod, jak Haŭroš, pad śvistam snaradaŭ źbiraje hryby na palihonie — vajskoŭcam niekali addali ŭradžajny na biełyja les. Dyj strelby jak na zło adbyvajucca ŭ taju samuju paru, kali vyłaziać hryby. I kolki b ni pužali amataraŭ cichaha palavańnia tabličkami «Uvaha! Strelby», «Uvaha! Radyjacyja», kolki b ni vystaŭlali zasłonaŭ, niekatorym ščaścić prabracca chmyźniakom na prahalinu dy kab paśla paśpieć adpaŭźci pad kananadaju.
Usio, kab paśla pachvalicca — maŭlaŭ, ja za raz 400 biełych znajšoŭ! Što ŭ paraŭnańni z hetym tony zbožža?! Navat kali pałova z tych hryboŭ była čarvivaja, dyk ža i ziernie toje nie z najlepšych, ale ž sušać i adno i druhoje. Navat kiroŭcy hruzavikoŭ, što čakajuć čarhi da kambajnu, paśpiavajuć prabiehčysia pa chmyźniakach uzdoŭž pola, dzie rastuć šyzyja babki. Pra pažarnikaŭ, što pilnujuć biaśpieku žniva, i kazać niama čaho. Hetyja zumyśla spyniajucca bližej da boru.
Niama kali prostamu biełarusu słuchać ciapier ŚMI. Daj boh paśpieć pierapracavać nabytki — vyvaryć dy vysušyć. A paśla jašče trapić u bruśnicy i žuraviny, pa maślaty dy zialonki. Tutaka nie da Dažynak!
Baranavičy
Ciapier čytajuć
Byłyja žonka i dziaŭčyna Pratasieviča abjadnalisia i pryjšli da jaho novaj niaviesty, kab adpomścić. I pahražajuć sudom4
Kamientary