Treba ź niečaha pačynać: «Lapisy» patłumačyli vystup na mitynhu ŭ padtrymku Navalnaha

U paniadziełak stała viadoma, što 6 vieraśnia (piatnica) na praśpiekcie Sacharava ŭ rasijskaj stalicy projdzie mitynh prychilnikaŭ kandydata ŭ mery Maskvy Alaksieja Navalnaha.

Arhanizatary abiacajuć 25 tysiač prysutnych i pierakryćcio ruchu dla zručnaha mantažu sceny. U akcyi taksama voźmuć udzieł «Nočnyje snajpiery», Vasia Abłomaŭ, «Niesčastnyj słučaj», a taksama biełaruski hurt «Lapis Trubiackoj».

Mitynh na praśpiekcie Sacharava stanie apošniaj sustrečaj Navalnaha z vybarcami. Kancert pačniecca, a 17:30. Vystup «Lapisa Trubiackoha» zapłanavany na 21.00.

Siońnia biełaruski hurt patłumačyŭ matyvy vystupu na mitynhu, zaznačajučy, što rašeńnie padtrymać Navalnaha na vybarach mera Maskvy vyklikała haračyja sprečki i mnostva pytańniaŭ z boku prychilnikaŭ hrupy.

«My vyrašyli, što treba bolš vyrazna akreślić svaju pazicyju», — havorycca ŭ zajavie:

1. My padzialajem daloka nie ŭsie pohlady Navalnaha. Niešta nam zdajecca sprečnym, niešta — i zusim niapravilnym. Ale my ličym, što Navalny robić vielmi šmat dla raźvićcia hramadzianskaj supolnaści

2. My — biełarusy i nie možam hałasavać na maskoŭskich vybarach. Ale my vyrašyli padtrymać kandydata ŭ mery Maskvy Navalnaha, bo ŭpeŭnieny: staruju sistemu ŭłady, jakaja isnuje ŭ Rasii, Ukrainie, Biełarusi, Kazachstanie i h. d. sistemu, zasnavanuju na chłuśni, karupcyi, kradziažy i hvałcie, treba złamać.

3. Naš udzieł u mitynhu-kancercie Navalnaha nijak nie paŭpłyvaje na niezaležnaść anarchasindykata «Lapis Trubiackoj». My nie płanujem ŭstupać u niejkija partyi, siadzieć na źjezdach, stanavicca davieranymi asobami jakich by tam ni było palitykaŭ.

Ale my ličym, što vystupić na kancercie, dzie źbiarecca vialikaja kolkaść maładych, aktyŭnych, nieabyjakavych da ŭłasnaha budučyni ludziej — značna bolš hanarova i karysna, čym syhrać na čarhovym «Słavianskim bazary» abo «Novaj chvali» .

4. U svajoj tvorčaści hurt «Lapis Trubiackoj» nadaje vialikuju ŭvahu sacyjalna-palityčnaj tematycy, čaściakom — u žanry satyry. Navalny taksama aktyŭna vykarystoŭvaje humar i satyru ŭ palityčnaj baraćbie, i hetym my ź im padobnyja.

5. Vam nie abaviazkova padzialać usie našy pohlady, husty i zvyčki, kab lubić našu muzyku. Kali chtości pierastanie słuchać hurt «Lapis Trubiackoj» z-za taho, što nie lubić Navalnaha — značyć, nam pieršapačatkova było nie pa darozie.

6. I, narešcie, apošniaje:

na kancercie ŭ padtrymku Navalnaha my vystupajem biaspłatna, bo nie handlujem svaimi pohladami.

• 0
• 0
• 0
• 0
• 0
• 0
• 0
• 0