Abama ŭpeŭnieny, što Rasija kiruje terarystami na Danbasie

Prezident ZŠA Barak Abama abvinavaciŭ Rasiju ŭ tym, što jana ŭzbroiła i navučyła vajavać terarystaŭ na Danbasie, jakija nie dapuskajuć mižnarodnych ekśpiertaŭ da źbitaha Boeing-777.

Pavialičyć

Pra heta jon zajaviŭ padčas svajho vystupu ŭ Vašynhtonie pierad presaj suviazi ź pieraškadžeńniem terarystami mižnarodnamu rasśledavańniu krušeńnia Boinha na ŭschodzie Ukrainy.

«Rasija i prezident Pucin niasuć pramuju adkaznaść, kab zaachvocić ich (terarystaŭ) supracoŭničać sa śledčymi. Heta minimum, što jany mohuć zrabić. Prezident Pucin skazaŭ, što jon padtrymlivaje poŭnaje rasśledavańnie, ale za hetymi słovami pavinny być dziejańni. Rasija pavinna damahčysia, kab sieparatysty pierastali hulać z dokazami, dali śledčym poŭny dostup. Sieparatysty i ich rasijskija sponsary adkaznyja za ich biaśpieku. Siońnia my budziem pracavać nad hetym pytańniem u AAN», — zajaviŭ Barak Abama.

Jon adznačyŭ, što mižnarodnyja śledčyja ŭžo znachodziacca na miescy. «Što im treba, dyk heta poŭny dostup, biez pramarudžańniaŭ. Kamanda hatovaja pravieści rasśledavańnie i znajści zahinułych, ale prarasiejskija sieparatysty praciahvajuć błakavać śledčych. Jany praciahvajuć nie puskać ich na miesca, stralajuć u pavietra, kali śledčyja nabližajucca. Sieparatysty pierasoŭvajuć dokazy. I heta vyklikaje pytańnie, što jany sprabujuć schavać? Takim pavodzinam niama miesca ŭ hramadzie nacyj», — padkreśliŭ prezident ZŠA.

Pavodle pierakanańnia Abamy, Rasija maje «nadzvyčajny ŭpłyŭ» na bajevikoŭ. «Nichto hetaha nie admaŭlaje. Jana ich treniruje, uzbrojvaje, uklučajučy sistemy, jakija źbivajuć samaloty, lidary sieparatystaŭ — rasijskija hramadzianie», — skazaŭ Abama. Jon ličyć, što «našy sajuźniki zasłuhoŭvajuć viedać, što adbyłosia, vyjavić fakty». «My pavinny harantavać, što praŭda budzie ŭstanoŭlena», — padkreśliŭ prezident ZŠA.

Adnosna kryzisu va Ukrainie ŭ cełym, Abama znoŭ padkreśliŭ, što «addaje pieravahu pošuku dypłamatyčnaha rašeńnia». «Ja vieru, što heta moža adbycca. Ale kali Rasija budzie praciahvać parušać suvierenitet Ukrainy i padtrymlivać hetych sieparatystaŭ, a jany robiacca ŭsio bolš niebiaśpiečnymi, i zaraz užo nie tolki dla ludziej va Ukrainie, ale i dla mižnarodnaha tavarystva, Rasija tolki bolš budzie izalavać siabie ad mižnarodnaj supolnaści, a košt za takija pavodziny budzie tolki raści. Ciapier čas dla Pucina i Rasi — zbočyć sa šlachu, jakim jany ciapier iduć», — dadaŭ Abama.

• 0
• 0
• 0
• 0
• 0
• 0