Miadźviedzieŭ: U vypadku adklučeńnia Rasii ad SWIFT naša reakcyja budzie biez abmiežavańniaŭ

29 studzienia ministry zamiežnych spraŭ ES mohuć abmierkavać pytańnie ab adklučeńni Rasii ad sistemy SWIFT. Kali takoje rašeńnie budzie pryniata, to jano pryviadzie da spynieńnia pieravodaŭ i abmienu infarmacyjaj pamiž rasijskimi i zamiežnymi bankami.

Ahienctva Bloomberg sa spasyłkaj na pradstaŭnika Jeŭrakamisii, jaki adkazvaje za składańnie novaha śpisu sankcyj u dačynieńni da Rasiei, paviedamiła, što ministry zamiežnych spraŭ krain ES na sustrečy 29 studzienia razhledziać pašyreńnie zabarony na ekspart u tych ci inšych technałohij u Rasiju, pašyreńnie pieraliku rasijskich kampanij i bankaŭ, jakim zabaroniena budzie pryciahvać hrošy ŭ ES, a taksama zabaronu Rasii vykarystoŭvać sistemu SWIFT.

Premjer-ministr Dźmitryj Miadźviedzieŭ rezka adreahavaŭ na infarmacyju ab mahčymym adklučeńni SWIFT. «U vypadku pryniaćcia takich rašeńniaŭ chacieŭ by adznačyć, što naša ekanamičnaja reakcyja, dyj naohuł ŭsiakaja inšaja, budzie biez abmiežavańniaŭ», — skazaŭ Miadźviedzieŭ.

U hetym miesiacy mahčymaje adklučeńnie SWIFT kamientavaŭ u Davosie kiraŭnik Vnieštorhbanka Andrej Kościn. «Kali takoje zdarycca, heta pryviadzie da imklivaha paharšeńnia adnosin pamiž Uschodam i Zachadam. Kali heta zdarycca, na nastupny dzień pasły ZŠA ŭ Rasii i Rasii ŭ ZŠA mohuć pakidać stalicy. Takoje ŭžo było ŭ adnosinach ZŠA i Irana. Heta aznačaje poŭnuju adsutnaść dyjałohu», — skazaŭ tady Kościn.

Pa słovach Kościna, adklučeńnie SWIFT aznačała b, što krainy znachodziacca na miažy vajny i ŭžo dakładna ŭvajšli ŭ stadyju chałodnaj vajny.

SWIFT (Society for worldwide interbank financial telecommunications) — heta kaapieratyŭnaja supolnaść mižbankaŭskich finansavych telekamunikacyj sa štab-kvateraj u Brusieli. Dziakujučy hetaj sistemie banki abmieńvajucca dakumientami i płaciažami va ŭsim śviecie. Na dadzieny momant u bankaŭ dla ŭzajemadziejańnia z zamiežnymi kontrahientami ŭ płanie valutnych pieravodaŭ i abmienu dakumientami alternatyvy SWIFT praktyčna niama.

Prapanova ŭžyć takuju mieru ŭpieršyniu prahučała ŭ vieraśni minułaha hoda. Z takoj inicyjatyvaj vystupali Jeŭraparłamient i premjer-ministr Vialikabrytanii Devid Kemieran.

Tym nie mienš, takoje rašeńnie pakul małaimaviernaje. Možna mierkavać, što Zachad adkładzie jaho na vypadak, kali rasijskija siły pierakročać miežy Danieckaj i Łuhanskaj abłaściej, kab zachapić jašče i kalidor u Krym.

• 0
• 0
• 0
• 0
• 0
• 0
• 0
• 0