Namieśnica kiraŭnika Administracyi prezydenta źniapraŭdziła paviedamleńni ab tym, što ŭłady prapanoŭvali Alaksandru Kazulinu svabodu ŭ abmien na emihracyju, ale...
Pavodle N. Piatkievič, takija zajavy varta rasceńvać jak «pravavuju niepiśmiennaść ci palityčnuju spekulacyju». U interviju «Interfaksu» namieśnica kiraŭnika Administracyi prezydenta padkreśliła, što «pavodle zakanadaŭstva mahčymyja tolki dva šlachi daterminovaha vyzvaleńnia ź miescaŭ pazbaŭleńnia voli: vyzvaleńnie ad adbyvańnia pakarańnia, i tady čałaviek robicca volnym, ci zamiena pakarańnia na bolš miakkaje… Vyzvaleńnie z prymusovym nakiravańniem u inšuju krainu — heta poŭny absurd».
N. Piatkievič paviedamiła, što «da prezydenta sapraŭdy źviartalisia dyplamatyčnyja pradstaŭniki i dziaržaŭnyja dziejačy zamiežnych dziaržavaŭ z prośbaj dać mahčymaść Kazulinu supravadžać jaho žonku za miažu na lačeńnie».
Pavodle namieśnicy kiraŭnika prezydenckaj Administracyi, «zychodziačy z humannych mierkavańniaŭ, z ulikam vyklučnych abstavinaŭ naša kraina paćvierdziła hatovaść pajści na hety krok. Asudžany admoviŭsia, heta jahonaje prava».
Natalla Piatkievič zajaviła, što «dziaržava ŭ składanaj dla hetaj siamji sytuacyi paviała siabie hodna i humanna. Toje, što ciapier pačynajuć spekulavać na hetaj temie, prynamsi nieetyčna».
Słovy Natalli Piatkievič kamentuje ahladalnik radyjo «Svaboda» Jury Drakachrust:
Z tłumačeńniaŭ Natalli Piatkievič zastałosia niezrazumiełym, jakomu ž z nazvanych joj zakonnych šlachoŭ daterminovaha vyzvaleńnia ź miescaŭ pazbaŭleńnia voli adpaviadaŭ «humanny i hodny krok» biełaruskich uładaŭ. Kali pieršamu, heta značyć vyzvaleńniu ad adbyvańnia pakarańnia, to čamu hetaje vyzvaleńnie ŭłady źviazvali z pajezdkaj Kazulina z žonkaj u Niamieččynu? Vyzvalili b, a tam užo jon by sam vyrašaŭ, što jamu rabić.
Kali razmova išła pra zamienu pakarańnia na bolš miakkaje, to na jakoje? Chiba što Kazulinu prapanavali źjeździć z žonkaj u Niamieččynu na lačeńnie, a potym viarnucca za kraty. Kali tak, to hetaja prapanova jakraz i była vyšturchoŭvańniem palityka z krainy «pa zmaŭčańni».
Kamientary