12 čałaviek u Niderłandach adpravili na karancin praz pamyłki ŭ pracy z chantavirusam
Karancin u hetym vypadku pavinien praciahvacca 42 dni, abo šeść tydniaŭ.
Dvanaccać supracoŭnikaŭ miedycynskaha centra ŭ Niejmiehienie byli adpraŭlenyja na šaścitydniovy karancin paśla parušeńniaŭ pratakołaŭ pry pracy z pacyjentam, zaražanym chantavirusam, paviedamlajuć ŚMI.
Pacyjent, jaki pastupiŭ 7 maja i byŭ pasažyram kruiznaha sudna MV Hondius, dzie raniej była zafiksavanaja ŭspyška virusa, prajšoŭ standartnuju praceduru zaboru i apracoŭki kryvi, choć z-za asablivaściaŭ chantavirusa patrabavaŭsia ŭzmocnieny režym bijabiaśpieki. Paźniej vyśvietliłasia, što i pry ŭtylizacyi mačy nie byli vykananyja aktualnyja mižnarodnyja pradpisańni.
«Niahledziačy na vielmi nizkuju vierahodnaść zaražeńnia, 12 supracoŭnikaŭ u metach pieraściarohi adpraŭlenyja na karancin na šeść tydniaŭ», — zajavili ŭ miedcentry.
U krasaviku łajnier MV Hondius pad ściaham Niderłandaŭ vyjšaŭ z Ušuaja (Arhiencina) i nakiravaŭsia da Kanaraŭ. Na jaho borcie znachodzilisia kala 150 čałaviek, u tym liku hramadzianie Vialikabrytanii, Ispanii, Niderłandaŭ i ZŠA.
Ciaham miesiaca pamierli try čałavieki. Tak, 6 krasavika 70‑hadovy hramadzianin Niderłandaŭ adčuŭ niedamahańnie i paźniej pamior. Jaho žonka, jakaja syšła na bierah na vostravie Śviatoj Aleny, pamierła 26 krasavika ŭ PAR, dzie analizy paćvierdzili zaražeńnie chantavirusam. Hramadzianka Hiermanii pamierła na sudnie 2 maja.
10 maja na Tenieryfie pačałasia evakuacyja pasažyraŭ MV Hondius. Usie turysty, jakija syšli na bierah, prachodzili abśledavańnie na najaŭnaść virusa. Pavodle danych SAAZ, kala dziesiaci čałaviek zdali stanoŭčy test na chantavirus.
Kamientary