«Biełsat» pabyvaŭ u vioscy byłoha śpiecnazaŭca, jakoha zabili na Danbasie.
Hałoŭny ideałahičny padmurak aficyjnaha Minska — słohan pra toje, što ŭ nas niama vajny. Ale heta zusim nie tak. Vajna, jakaja idzie pamiž Ukrainaj i Rasijaj, užo tut, u Biełarusi. Praz hieorhijeŭskija stužki, jakija stali simvałam akupacyi Danbasu, praź dziasiatki tysiač uciekačoŭ, praz zabitych biełaruskich hramadzian, jakija viartajucca damoŭ u cynkach z ukrainska-rasiejskaj miažy.
Vadzim Vasileŭski, prafiesijny biełaruski śpiecnazaviec, nie dažyŭ da 35-hodździa mienš za 2 miesiacy. Jaho pachavali 12 lipienia. Jašče miesiac tamu jaho bačyli ŭ baćkoŭskaj vioscy. Pra toje, što jon jedzie vajavać na Danbas, kažuć, nichto nie viedaŭ. Pavodle siabroŭ, jon zahinuŭ na miažy Rastoŭskaj vobłaści.
«Kałona išła, i snarad trapiŭ naŭprost u mašynu. Jaho na kuski pa častkach źbirali, paznali tolki pa tatu, što heta jon, i pa radzimkach. Nu, baćki ž viedajuć, viadoma», — kaža Vital, siabra Vadzima Vasileŭskaha.
Vasileŭski słužyŭ u armiejskim śpiecnazie, 5 bryhadzie admysłovaha pryznačeńnia. Zvolniŭsia kala 5 hadoŭ tamu ŭ zvańni kapitana. U jaho zastalisia 2 dziaciej, žonka, baćka i maci.
«Byli ź im sasłužyŭcy, vajskoŭcy nieśli trunu i ŭ carkvu, i z carkvy. Kolki tut da mohiłak, kiłamietry 2 z pałovaju, nieśli na rukach trunu», — praciahvaje Vital.
Na pytańnie, čamu Vasileŭski pajechaŭ na Danbas, siabar adkazvaje: «Adnym słovam — sałdat udačy. Jamu padabałasia ŭsio vajskovaje».
Paśla zvalnieńnia z 5 bryhady Vasileŭski pracavaŭ instruktaram u Centry admysłovaha rychtavańnia «Dynama». Na Danbasie jon vajavaŭ na baku DNR. Pieršaje paviedamleńnie pra jahonuju śmierć źjaviłasia ŭ vieraśni 2014 hoda. Apošni zapis na jaho staroncy ŭ «Fejsbuku» — krasavik 2015-ha.
To bok jon braŭ udzieł u bajavych dziejańniach minimum kala hoda, i pracaŭniki śpiecsłužbaŭ musili viedać pra fakt najmictva, ale zamiest hetaha zacikavilisia pracaj «Biełsata».
Padčas padrychtoŭki hetaha repartažu i sproby parazmaŭlać z kamandavańniem 5 asobnaj bryhady zdymačnuju hrupu zatrymali, kanfiskavali fłeš-kartu ź videakamiery z častkaju adźniatych materyjałaŭ. Pracaŭniki Kamitetu dziaržbiaśpieki raspačali pavierku pavodle kryminalna-pracesualnaha kodeksu pa fakcie zdymkaŭ.
Ciapier čytajuć
Pratasievič znoŭ ženicca — ciapier z tarołaham Nastaśsiaj, jakaja pracavała ŭ elitnym miedcentry «Miersi»34
Kamientary