«Iryna Pałm zrobić heta najlepiej»

Iryna Pałm zrobić heta najlepiej (Irina Palm)
Belhija – Luksiemburh – Vialikabrytanija – Niamieččyna – Francyja, 2007, kalarovy, 103 chv.
Režyser: Sem Harbarski
Roli vykonvajuć: Maryan Fejtfuł, Miki Manojłavič, Kievin Bišap, Siobet Hjulet, Dorka Hryłas
Žanr: Drama
Pryzy, festy: Naminacyja na “Załatoha miadźviedzia” Berlinskaha kinafestu, naminacyja na Eŭrapiejski pryz za najlepšyja aktorskija roli (Maryan Fejtfuł i Miki Manojłavič)
Adznaka: 7,5 (z 10)

Ścipłaja chatniaja haspadynia-ŭdava Mehi, kab vyratavać chvoraha ŭnuka, najmajecca pracavać u načny klub. Tam jana zadavalniaje mužčynaŭ najpraściejšym metadam. Słava pra jejnuju “ručnuju pracu” raście, ale ni siamja, ni siabroŭki nie zdahadvajucca, što piacidziesiacihadovaja žančyna – znakamitaja Iryna Pałm…

Mastactva – zaŭždy pravakacyja, jano dachodzić da miežaŭ, uhladajecca ŭ śmierć, skandał, zabaronienaje. Meta – raskryć čałavieka j jahonuju dušu, padnieści lusterka da tvaru kožnaha. My nikoli nia trapim u sytuacyju “Hamleta”, nia budziem šturmavać młyny ź dzidaju (“Don Kichot”) i ŭpotajki nia pojdziem u Mardor, kab źniščyć krynicu zła. Ale my paznajem u hierojach siabie – i našy žyćciovyja sytuacyi.

Karcina Sema Harbarskaha, chacia j hučyć u pierakazie skandalna, nadzvyčaj dalikatnaja j taktoŭnaja (anivodnaj pluhaj sceny). Stužka zroblenaja na namiokach, adcieńniach emocyj i bliskučaj aktorskaj hulni pad trapna-medytatyŭnuju muzyku “Ghinzu”. Dla stvaralnikaŭ filmu istotnyja nie kłubnična-pabytovyja padrabiaznaści seks-industryii, a tvary, pozirki, luboŭ, nianaviść, paharda, zdolnaść daravać.

Babula lubić unuka, niaviestka nienavidzić jaje, syn-rochla apuściŭ ruki j azłobiŭsia, hanarovy ŭładar načnoha klubu chavaje samotu pad maskaj cynizmu. A hierainia va ŭzroście znachodzić siły, kab znoŭ raskryć svajo serca.

Maryan Fejtfuł (Mehi – Iryna Pałm) i Miki Manojłavič (stały aktor Kusturycy, u filmie – haspadar klubu) – kranalna-naiŭnyja, jak padletki, jakija nia viedajuć, jak pryznacca ŭ pieršym kachańni. Ale, kali padletkam zaminaŭ brak dośviedu, to starym hierojam zaminajuć zvyčki, praca i viek.

Iranična-daścipnyja maski siabrovak-kumušak, biezhrašoŭje i plotki ŭ kramie; rospačnaja histeryka syna, jaki daviedaŭsia, čym zajmajecca jahonaja maci…

Hladzicie. Heta sapraŭdnaje kino pra žyćcio.

Kinaterminy

Kinapadziei

Usie filmy

Kinatvorcy

• 0
• 0
• 0
• 0
• 0
• 0
• 0
• 0